Өрүс эстэр кэмигэр салгын олбохтоох суудуналарга бырайыас үрдүө

Дьокуускай аннынан Аллараа Бэстээххэ туоруур сиргэ "Намыв” станцияҕа кэлэн турабыт. Билигин өрөспүүбүлүкэ үрдүнэн муус суоллар бары сабыллан тураллар, арай Уус Куйга - Хаһааччыйа хайысханан кыһыҥҥы суол 20 туоннаҕа диэри көҥүллээх үлэлии турар. Оттон үс өрүскэ, ол эбэтэр Өлүөнэҕэ, Алдаҥҥа уонна Бүлүүгэ салгын олбохтоох суудунанар сылдьаллар. Сүрүн туорааһыҥҥа Дьокуускай - Аллараа Бэстээх хайысхаҕа отучча суудуна дьону утары кытылга таһар.

Көрөрбүт курдук сырыы субуллан олорор. Бу станцияттан чааһынай таһааччыны кытта "Саха сирин тимир” суолларын пассажирдара айанныыллар. Сырыы хас күн аайы сарсыарда 7 чаастан саҕаланар. Итиэннэ күн устата бириэмэнэн болдьоҕо суох, туолан иһиинэн сылдьар. Салгын олбохтоох суудуналар күн сырдыгар айанныыллар. Оттон киэһээҥҥи өттүгэр биир дьуһуурустубаҕа диэн хаалар.

Сыана туһунан этэр эбит буоллахха, улахан киһиэхэ 2500 солкуобай буолар. Билигин улахан уута суох кэмҥэ ортотунан 15 мүнүүтэ туоранар. Ол эрэн суудуна айанныыр сиринэн быйыл өрүс уолан, кумахтаах сир олус элбэх. Бу ый ортотугар өрүс эстиэ. Маныаха суол-иис өссө алдьыныа. Ол эрэн хайа да кэмҥэ анаара кытылга айан тохтуо суохтаах. Маннык түгэҥҥэ аэробот диэн өрүс бара турар кэмигэр дьону куттала суохтук таһар аал тахсыаҕа. 

Борис Строев, "ЛенаВодСервис" тэрилтэ салайааччыта: "Өрүс хойуутук уһуннаҕына, харыы таҕыстаҕына салгын олбохтоох суудуналар сырыыларын тохтотобут. Бу кэмҥэ аэроботтар сылдьыахтара. Маннык кэм 1-2 күн буолуон сөп эбэтэр олох да түүн ааһыан сөп, харыы тахсымыан сөп. Онон дьылыттан тутулуктаах".

Онон эбэ хайдах ааһарыттан көрөн уопсайа барыта быыһык кэмҥэ 10 аэробот сырыыга тахсыаҕа. Оттон арай бу көрүҥ тиэхиньикэ сатаан сылдьыбат түгэнэ үөскээтэҕинэ  Маҕан аэропордуттан Мэҥэ Хаҥалас Павловскайыгар бөртөлүөт көтүө. Бу кэмҥэ бырайыас үрдүөҕэ. Ол курдук аэробот төлөбүрэ 5000 буолуоҕа, оттон бөртөлүөт 7 тыһыынча, 12 диэри саастаах оҕолорго 50% чэпчэтии көрүллэр.  

Маны сэргэ Бүлүү өрүскэ үс сиринэн, ол эбэтэр Сунтар - Устье, Кириэстээх - Мииринэй, Үөһээ Бүлүү - Хоро хайысхаларынан биирдии салгын олбохтоох суудуна сылдьар. Манна  бырайыас 1000 солкуобай. Оттон Өлүөнэҕэ Кангалаас аннынан 2 хивус сылдьар, сыаната 2000 солкуобай. Алдан өрүһү дьон 2500 солкуобайга туоруур.