Аҕыйах ахсааннаах хотугу норуоттар күннэрэ бэлиэтэннэ

Дьокуускай куорат болуоссатыгар аҕыйах ахсааннаах төрүт олохтоох омуктар күннэрэ киэн далааһыннаахтык бэлиэтээтибит. Биир бастакынан өбүгэ үгэһинэн ыраастаныы тэрээһинин ыыттылар, алгыс тыллары эттилэр.

Анаабыр улууһуттан төрүттээх, аҕам саастаах Елена Тимофеева бу үөрүүлээх күн киэргэнэн, таҥнан-симэнэн кэлбит. Кини долган норуотун түмсүүтүн сүүрбэттэн тахса сыл салайан, норуотун туһугар үлэлээн кэлбит киһинэн буолар.

Елена Тимофеева, Анаабыр улууһун олохтооҕо: "Биһиэхэ долганнарга төрүт дьарыкпыт таба иитиитэ, булт балык буолар. Түмсүүбүтүн табабытын, тылбытын харыстыыр сыалтан тэриммиппит".

Эдьигээн улууһуттан төрүттээх, түөрт оҕо амарах ийэтэ, Анна Петрова оҕолорун кыра саастарыттан бэйэлэрин төрүт тылларынан саҥарарга, ааҕарга, ыллыырга үөрэтэр, иитэр эбит.

Анна Петрова, Эдьигээн улууһун олохтооҕо: "Эбээннии тылынан ыаралары ыллыыбыт, төрүт таҥаспытын куруутун кэтэбит, омукпут үгэһин барытын тутуһабыт. Ону сэргэ сахалыы сиэрбитин эмиэ тэҥҥэ илдьэ сылдьабыт".

Бу бэлиэ күн аҕыйах ахсааннаах төрүт норуоттар мустан, бар дьоҥҥо бэйэлэрин үгэстэрин, култуураларын көрдөрдүлэр. Быыстапка-дьаарбааҥка,  кэнсиэр, араас күрэхтэр ыытылыннылар. Хотугу норуоттар олохторун-дьаһахтарын толору көрдөрөр улахан бырааһынньыгы тэрийэн ыыттылар.

Мария Свинобоева,  Анаабыр улууһун олохтооҕо: "Өбүгэлэрбит төһөлөөх күүппүттэрэ буолуой, бу курдук омук быһыытынан туһунан күннээх буолалларын? Биһиги бастакы бырааһынньык кыттыылаахтара буоллубут, онтон наһаа диэн үөрэбит".

Саха сиригэр төрүт олохтоох норуоттар култуураларын, үгэстэрин сайыннарыыга, тарҕатыыга араас элбэх анал бырагыраамалар үлэлииллэр.

Елена Голомарёва, Ил Түмэн аҕыйах ахсааннаах Хотугу норуоттар уонна Арктика дьыалаларын боппуруостарыгар сис кэмитиэтин бэрэссэдээтэлэ: "Аҕыйах ахсааннаах төрүт омуктарга туһуланар сокуоннары таһаарыынан уонна кинилэр олохторугар болҕомтону ууруунан Саха сирэ дойдуга холобур буолар".

Күн бүгүн Саха сирин  үрдүнэн 40 тыһыынчаттан тахса аҕыйах ахсааннаах норуот олорор. Өрөспүүбүлүкэ сайдыытыгар улахан кылааттарын киллэрэллэр, регион элбэх омуктаах култууратын байыталлар.