50 бастыҥ үлэһит “Үлэ киһитэ” наҕарааданы тутта

Кэнники сылларга үгэскэ кубулуйбут  "Үлэ киһитэ" бириэмийэни саас уонна үлэ бырааһынньыгын көрсө үөрүүлээх быһыыга-майга туттараллар. Саха сирин бастыҥ үлэһит дьоно бочуоттаах ааты таһынан 300 тыһыынча харчынан наҕараадаланар. Сыл ахсын 50 киһи "Үлэ киһитэ" үрдүкү ааты сүгэр.

Пётр Винокуров,  "Якутлесресурс" тэрилтэ Мэҥэ Хаҥалас улууһунааҕы филиалын ойуур харыстабылыгар инженерэ: "Үөрэхпин бүтэриэхпиттэн ойуур хаһаайыстыбатын эйгэтигэр үлэлии сылдьабын. Номнуо 40 тахса сыл буолла. Бастаан леснигынан саҕалаабытым". 

Хас биирдии киһи  олох-дьаһах араас эйгэтигэр үтүө суобастаахтык үлэлии-хамсыы, айа-тута сылдьар. Галина Софронова Өрөспүүбүлүкэтээҕи 2 №-дээх балыыһа  суһал көмө киинин старшай медицинскэй сиэстэрэтэ. Үйэтин тухары биир балыыһаҕа номнуо 44 сылын үлэлиир, дьон доруобуйатын туһугар туруулаһар. 

Галина Софронова,  СӨ 2№-дээх балыыһатын старшай медицинскэй сиэстэрэтэ: "Биһиги суһал балыыһаҕа биир хамаанданан үлэлиир буоламмыт маннык ситиһии кэлэр. Бу соҕотох киһи ситиһиитэ буолбатах. Кэлэр көлүөнэҕэ үлэлэрин таптыылларын баҕарыам этэ". 

Быйыл барыта сүүһүнэн сайаапка киирбититтэн туһааннаах хамыыһыйа 50 бастыҥы талан лауреат аатын ыллылар. Ил Дархан бэлиэтээбитинэн бу бириэмийэҕэ салайааччылар буолбакка көннөрү үлэһит киһини өрө тутан билинии буолар.  

Айсен Николаев,  СӨ Ил Дархана: "Дьиҥ баайбыт сир баайа буолбатах, дьиҥ баайбыт дьон, үлэ дьоно буолар. Сахабыт сиригэр үлэни өрүү өрө тутар этибит, тутабыт даҕаны. Тоҕо диэтэр биһиги курдук тыйыс усулуобуйалаах сиргэ үлэлээтэхпитинэ-хамнаатахпытына эрэ сайдар кыахтаахпыт". 

Ыраах Булуҥ улууһуттан кэлбит Дмитрий Наумов  улуустааҕы хаһаайыстыба балыксыта. Үйэтин тухары сопхуос саҕаттан күн бүгүнүгэр диэри балыксыттыыр. Бу кыайыы соһуччу буолан хас да бүк үөрүүлээҕин  Дмитрий Николаевич этэр.

Дмитрий Наумов, "Булуҥ" хаһаайыстыба балыксыта: "Үөрэммин сатаан саҥарбат да буола сылдьабын. Соһуччу кэллэ. Барыларыгар махтаныам этэ, чуолаан, дьиэ кэргэммэр, салайааччыларбар". 

Наҕараадаланааччылар истэригэр хачыгаар, геолог, дирижер, сварщик, бэтэринээр, режиссер, урбаанньыт, тренер бааллар.

Пётр Бурцев,  төрүт оонньуулар кииннэрин хапсаҕайга тренерэ: "Тренердэр үлэлэрин сыаналаатылар, манан биһиги төрүт көрүҥнэр кииммит үлэтин түмүгэ көстөр".

Үлэ киһини киһи гынар, киэргэтэр, кынаттыыр. Үлэ киһитигэр эҕэрдэ бастыҥа.