Үлэһит идэни баһылыан баҕалаах сыллата элбиир

Пилота суох көтөр аалларыы үөрэтиигэ дьарык. Устудьуоннар мэһэйдэри туоруурга, түргэн-тарҕан сырыыга үөрэнэллэрин суруналыыстарга көрдөрөллөр.  Сибээс колледжыгар бу хайысханы күүскэ ылсан үөрэппиттэрэ икки 3 сылыгар барда. Оттон бу баараҕай кээмэйдээх дроннары устудьуоннар номнуо холкутук салайаллар. Кэлэр ыйтан судаарыстыбаннай сакааһы устарга бэлэмнэнэллэр.

Будимир Новгородов, П.И. Дудкин аатынан сибээс уонна информационнай технология колледжын устудьуона: «Геоскан-701 диэн ааттаах. Геодезияҕа, тутууга игин көмөлөһөр».

Сөмөлүөт быһыылаах дрон хаартыскаҕа түһэрэр, устарга аналлаах буоллаҕына, бу турар хас да атахтаах тыа хаһаайыстыбатыгар уоҕурдууну ыстарарга туһаныллар. Колледжка уопсайа бу хайысхаҕа 24 оҕолоох 3 бөлөх үөрэнэр.

Анна Курилкина, П.И. Дудкин аатынан сибээс уонна информационнай технология колледжын преподавателэ: «Ити хайысханан оҕолор 4 сылы быһа пилотированиеҕа БПЛА самолетного типа, мультироторного типа уонна смешанного типа үөрэтэллэр».

Суруналыыстарга салгыы сибээс идэтин баһылыахтаах устудьуоннары билиһиннэрэллэр. Күн бүгүн сибээс уонна информационнай технология колледжыгар 750 тахса оҕо үөрэнэр. Ааспыт сыллааҥҥы көрдөрүүнэн 5 бастыҥ орто үөрэх кыһатын ахсааныгар киирэр. Уопсайа 8 хайысханан сибээс эйгэтин идэтигэр устудьуоннар уһуйулаллар. Манна үөрэҕи уонна практиканы тэҥҥэ дьүөрэлии тутан исписэлиистэри бэлэмнииллэр.

Айсен Обоев, П.И. Дудкин аатынан сибээс уонна информационнай технология колледжын устудьуона: «Практика ааһа сылдьабыт. Үөрэхпин сөбүлүүбүн, интириэһинэй. Саҥаны билэбин».

Сыллата сибээс колледжыгар киириэн баҕалаах элбиир. Ол курдук былырыын 1 миэстэҕэ 14 оҕо туттарсыбыт. Манна 9 уонна 11 кылаас кэннэ ылаллар. Үөрэх кыһатын инники былаана киэҥ.

Гаврил Семёнов, П.И. Дудкин аатынан сибээс уонна информационнай технология колледжын дириэктэрэ: «Билигин ИИ уонна кибербезопасность өттүгэр үлэлиэхтээхпит. Сыл аайы 200 оҕо киирэр Саха сирин улуустарыттан барыларыттан. Билигин сыалбыт сорукпут Магаданы кытта үлэлиэхпитин баҕарабыт».

Магадаҥҥа салаа арылыннаҕына уобалаһы сэргэ Саха сирин илин улуустарын хабыахтара.