"Сахафармация" чэпчэтиилээх эминэн бүтүн Өрөспүүбүлүкэни хааччыйан олорор

Хас биирди эми-тому ааҕан, наардаан анал быраграмаҕа киллэрэллэр. Бу эмтэр Мииринэй оройуонугар айанныыллар. Фармацевт Светлана Егорова испиэһэккэ баар биир да эми көтүппэккэ, кичэйэн көрөн хомуйар. Уопсайа,  400-тэн тахса эмп хомуллуохтаах диэн этэр.

Светлана Егорова, фармацевт: «Күн аайы маннык сборочнай лист биэрэллэр. Манна ханна барара, ханнык эмп уонна хас устууката наадата барыта сурулла сылдьар».

Саха сирин нэһилиэнньэтин эминэн-томунан хааччыйар тэрилтэ склада толору. Манна хас биир эмп, киһи олоҕор, доруобуйатыгар быһаччы суолталаах. Онон тэрилтэ эппиэтинэһэ үрдүк.

Оттон бу, киһи олоҕо тутулуктанар эмтэрэ - инсулин, туспа сиргэ хараллар. Манна температура аҕыс кыраадыска диэри тымныы буолуохтаах. Ысклаад үрдүнэн маннык түөрт анал хос баар.

Сардаана Монастырёва, "Сахафармация" ыскылаатын сэбиэдиссэйэ: «Бу температурата 2-8 гыраадыска дылы тымныы сиргэ туруохтаах. Бу маны өрөспүүбүлүкэ араас муннуктарыгар барытыгар тарҕаттыбыт».

Быйыл чэпчэтиилээх эминэн хааччыйыы үбүлээһинэ икки төгүл үрдээтэ. Бу туһунан Ил Дархан Айсен Николаев быһа биэриигэ иһитиннэрдэ. Нэһилиэнньэни, дьону чэпчэтиилээх эминэн-томунан хааччыйыы тус хонтуруолугар тутарын биллэрдэ.

Күн бүгүн биир кэлим үлэни, сүрүннүүр киининэн - "Сахафармация" тэрилтэ буолла. Кини 150-тан тахса үлэһиттээх, өрөспүүбүлүкэ бары улуустарыгар салаалардаах, 30-тан тахса аптекалаах.

Эдуард Рехлясов, "Сахафармация" тэрилтэ дириэктэрэ: «Туох баар федеральнай, региональнай бырагыраамалар биһиги складпытынан ааһар. Туох баар улуустарга, аптекаларга, пууннарга тарҕаналлар. Күн аайы эмп тутабыт уонна илдьэбит. Ил Дархаммыт улахан болҕомто ууран турар».

Ааспыт ыйга тэрилтэҕэ колл-киин үлэтин саҕалаата. Мантан ыла олохтоохтор, кыһалҕалаах боппуруостарынан, 402-402 нүөмэргэ эрийиэхтэрин сөп. Күн бүгүн 1200-тэн тахса иһитиннэрии киирбитэ  быһаарылынна.