Саха сирин бастыҥ үлэ династияларын Бочуот кинигэтигэр киллэрдилэр

Мэҥэ-Хаҥалас улууһун Майа нэһилиэгин олохтооҕо Илья Колосов оҕону иитии систиэмэтигэр 40 тан тахса сыл үлэлээн кэлбитэ. Үөрэҕирии эйгэтигэр Колосовтар уопсай ыстаастара 400-тэн тахса сыл. Кинилэр дьиэ кэргэннэригэр учуутал династиятын саҕалаабыт киһинэн Илья Семенович аҕата Семен Колосов буолар. 

Илья Колосов, Мэҥэ-Хаҥалас улууһун олохтооҕо: «Биһиги Колосовтар педагогическай династиябытын төрүттээбит аҕабыт Колосов Семен Петрович, 1912 сыллаах төрүөх уонна 2008 сыллаахха 96 сааһыгар барбыта. Кини учууталлаан 1920 сыллар бүтүүлэриттэн саҕалаабыта».

Быраабыыталыстыба 2 нүөмэрдээх дьиэтигэр Саха сирин бастыҥ үлэ династияларын чиэстээтилэр. Быйыл уопсайа 10 дьиэ кэргэн Бочуот кинигэтигэр киирдэ. Иван Ушатов сэдэх соҕус хайысха династиятын бэрэстэбиитэлэ. Кини күнү-дьылы кэтээн көрөр метеоролог идэлээх. Эмиэ аҕаларыттан салҕаан күн-бүгүнүгэр диэри ситиһиилээхтик үлэлии-хамсыы сылдьаллар.

Иван Ушатов, Сунтаар улууһун олохтооҕо: «Кириэстээххэ үлэлээбитим. 40-тан тахса сыл ыстаастаахпын. Убайдарым, эдьийдэрим, балтыларым, оҕолорум. Ону холбоон династияҕа киирбиппититтэн үөрэн турабыт».

Кэнники 10 сылга Бочуот кинигэтигэр бастыҥ үлэ династияларын ааттара тиһиллэр. Кинилэр бары олох-дьаһах араас хайысхатыгар эһэлэриттэн, эбэлэриттэн саҕалаан оҕолуун-уруулуун, бииргэ төрөөбүттэр буолан биир идэҕэ бэриниилэрин, көлүөнэттэн көлүөнэҕэ бэйэлэрин уопуттарын тиэрдэн, удьуор утума салҕанарын көрдөрөллөр. Дьоро тэрээһиҥҥэ өрөспүүбүлүкэҕэ социальнай үлэ сыһыаннаһыларыгар кэлэр 3 сылга 3 өрүттээх сөбүлэҥ баттанна. Быраабыыталыстыба, идэлээх сойуус Федерацията уонна табаары оҥорон таһаарааччылар сойуустара  ыкса ситимнээх үлэни ыыталлар.      

Николай Дегтярёв, СӨ идэлээх сойууһун Федерациятын бэрэссэдээтэлэ: «Үлэ хайысхаларын сүрүн тосхоллоро буолаллар. Биһиги саамай тутаах докумуоммут буолуоҕа. Тэрилтэлэр манна олоҕуран кэлэктиибинэй дуогабардарыгар, отраслевой соглашенияларыгар эбиилэри киллэриэхтэрэ».

Түмүккэ идэлээх сойуус Федерацията тэрийбит Бастыҥ социальнай партнер куонкурус түмүгүн таһаардылар. Икки хайысханан бюджет уонна оҥорон таһаарыы эйгэтин салаатыгар кыайыылаахтары бэлиэтээтилэр, дипломнары туттардылар.