Дьокуускайга көҕөрдүү үлэтигэр анаммыт кэмпириэнсийэ буолла

Киин куорат айылҕатын тупсарыы уонна сири-уоту, оту-маһы кэрэ көстүүлээх оҥоруу. Бу тула Дьокуускайга бастакытын көҕөрдүүгэ аналлаах научнай-практическай кэмпириэнсийэтэ буолла. Манна дойду улахан научнай лабораторияларын үлэһиттэрэ, учуонайдар, урбаанньыттар уонна бырабыытылыстыба үлэһиттэрэ кыттыыны ыллылар. Кинилэр бэйэлэрин уопуттарын, бырайыактарын көрдөрдүлэр, билиһиннэрдилэр, боппуруостарга эппиэттээтилэр

Владислав Слепцов, Дьокуускай баһылыгын куорат хаһаайыстыбатын боппуруостарыгар солбуйааччыта: «Барыта интириэһинэй, дьоннор бэлэмнэнэн кэлбиттэр. Боппуруос элбэх. Ол аата дьон сэҥээрэр эбит. Маннык кэмпириэнсийэ сыл аайы буолуоҕа».

Тэрээһиннэ улахан болҕомтону саҥа сквердэргэ уонна болуоссаттарга уурдулар. Экспертэр, киин куоракка оттоох-мастаах, ыраас салгыннаах киһи сынньанар сирэ тиийбэтин бэлиэтээтилэр. Кэмпириэнсийэ учуонайдартан саҕалаан, устудьуоннары кытта түмтэ. Саҥа исписэлиис буолаары сылдьар оҕолорго элбэҕи билэр-көрөр, саҥа бырайыактары кытта билсэр былаһаакка баар буолбута үөрдэр. Инникитин куоракка ландшафтнай архитектор үөрэхтээх улахан суолталаныаҕа. 

Ванесса Попова, АГАТУ устудьуона: «Биһиги үөрэхпитин бүтэрэн баран ландшафтнай архитектор буолуохпут. Маннык кэмпириэнсийэ көмөлөһөр».

Үлэ биир күнүнэн бүппэт. Тэрээһин чэрчитинэн, Москваттан кэлбит учуонайдар маһы хайдах олордуохха сөбүн туһунан маастар кылаастары ыытыахтара.  Кыттааччыларга, кэлбит ыалдьыттарга көҕөрдүүгэ туһалаах, көмөлөөх анал тиэхиньикэ, тэрил быыстапката турда. Манна дьиэ оҕуруотуттан саҕалаан,  тыаҕа тахсан мас эрбииргэ тиийэ наадалаах тиэхиньикэ баар.

Кэмпириэнсийэ түмүгүнэн, бу сайын Дьокуускайы көҕөрдүүгэ туһуламмыт резолюция баттанна. Дойду улахан куораттарыттан кэлбит учуонайдар олохтоох испиэсэлиистэр ирбэт тоҥҥо, кылгас кэм иһигэр ситиһэр ситиһиилэрин биһирээтилэр. Бэс ыйын 12 күнүгэр диэри бутун дойдутааҕы "Бастыҥ Бырайыак" күрэххэ Дьокуускайтан хас даҕаны бырайыак куоластааһыҥҥа барар буолла.