Нам улууһугар саҥа балыыһа үлэлээтэ

Саҥа балыыһа аныгы оборуудабанньанан толору хааччыллыбыт. Барыта 170-тан тахса мэдиссиинэ тэрилин араас көрүҥэ баар. Холобур, бу лучевой диагностика салаатыгар 3 скопическай рентген-комплекс кэлбит.  Үһүөн тус-туһунан аналлаах туттуллуохтара, оччотугар ыарыыны эрдэттэн булууга, диагноз туруоруутугар улахан көмөлөөх буолуоҕа.

Анна Кириллина, лучевой диагностика салаатын сэбиэдиссэйэ: "Биир көһөрүллэ сылдьар аппараат кэллэ. Ону сүрүннээн реанимацияҕа туттуохпут. Ону таһынан эпэрээссийэлиир блокка рентген кэллэ. Уонна рентген хоһо баар буолла, манна скопиялаах. Эрдэ оннукпут суох этэ". 

Эрдэ маннык аппараат суох буолан, олохтоохтор киин куоракка айанныыллар этэ.  Мантан инньэ Нам улууһун олохтоохторо олорор сирдэринэн көрдөрүнэр, чинчийии ааһар кыахтаныахтара. Доруобуйа харыстабылын саҥа эбийиэгэ 3700 квадратнай миэтэрэ уопсай иэннээх 3 этээстээх. Балыыһа дойду Президенэ көҕүлээбит "Уһун уонна көхтөөх олох" национальнай бырайыак чэрчитинэн тутулунна.

Алёна Мохначевская, эндоскопия салаатын медсиэстэрэтэ: "Билигин эбии бронхоскопия, колоноскопия кэллилэр. Онон улууспут дьоно куоракка барбакка, миэстэтигэр чинчийиини ааһыахтара". 

Саҥа эбийиэк 50 куойка-миэстэҕэ ананар. Тэрилтэ бастакы этээһигэр диагностика сулууспата, суһал көмө, акушерство уонна гинекология салаата бааллар. Иккис этээскэ терапия уонна реанимация, оттон үһүскэ эпэрээссийэлиир блок уонна хирургия салаата дьиэлэннэ. Балыыһа тутуутугар олохтоохтор бары көмөлөһөн улахан үлэни ыыттылар. 

Юрий Слепцов, "Нам улууһа" МТ баһылыга: "Наһаа элбэх киһи кэлэн субуотунньуктаата, наһаа киэҥ үлэ-хамнас барда. “Норуот күүһэ – көмүөл күүһэ” диэн мээнэҕэ эппэттэр диэни өссө төгүл дакаастаатыбыт".  

Саҥа балыыһа үөрүүлээх аһыллыытыгар баһылык Айсен Николаев кэнники сылларга Саха сиригэр уопсайа 100 тахса доруобуйа харыстабылын эбийиэгэ үлэҕэ киирдэ, аҥаардас Нам улууһугар бу кэмҥэ 6 биэлсэр-акушер пууна уонна быраас амбулаторията аһылынна диэн бэлиэтээтэ.

Айсен Николаев, СӨ Ил Дархана: "Биһиги өрөспүүбүлүкэбитигэр кэнники сылларга тутуллубут эбийиэктэри  олох чинчийэн көрөбүн. Тутуу барбыт сиригэр дьон доруобай буолар, ыарахан ыарыы аҕыйыыр, дьон олоҕо уһуур. Тоҕо диэтэххэ бу курдук үчүгэй усулуобуйаҕа үлэлээннэр быраастар куһаҕан ыарыыны эрдэттэн булаллар". 

Саҥа балыыһа 3 сыл кэриҥэ иһигэр дьэндэйэн таҕыста.  Национальнай бырайыак чэрчитинэн олоххо киирбит балыыһа нэһилиэнньэҕэ мэдиссиинэ көмөтүн оҥоруу таһымын хаачыстыбатын үрдэтиигэ кыах биэрэр.