"Стерх" балет бэстибээлэ үрдүк таһымҥа арылынна

Дойду бастыҥтан бастыҥнарын "Стерх" балет бэстибээлэ түмэр. "Ромео уонна Джульетта" туруорууга сүрүн оруоллары Сарыал Афанасьев уонна Краснодар театрын артыыһа Елена Шлыкова  толоруохтара. Икки уһулуччу үҥкүүһүттэр көрөөччүгэ көрүөхтэн кэрэ көстүүнү бэлэхтээри бэлэмнэнэллэр. 

Сарыал Афанасьев, Суорун Омоллоон аатынан Опера уонна балет тыйаатырын артыыһа: "Краснодар прима балеринатын Елена Шлыкованы кытта бииргэ үҥкүүлүүбүт. Ынырык долгуйабын, бүгүн бастакы бэлэмнэниибит". 

Ити курдук 12 төгүлүн ыытыллар бэстибээл үгэс быһыытынан киэҥ далааһыннаах. Большой уонна Мариинскай тыйаатырдартан уонна Россия регионнарын тыйаатырдара кыттыыны ыллалар.  Онон бэлэмнэнии күүстээхтик барар. Сцена киэргэлин оҥоруу, артыыстар көстүүмнэрин тигии.

Күүтүүлээх түгэн тигинээн кэлэр. Бэстибээл арыллара аҕыйах мүнүүтэ хаалар. Саала көрөөччүлэринэн туолар. Оттон сцена кэтэҕэр ураты тыын- хаалбыт мүнүүтэҕэ быччыҥы ититэн бүтэһиктээх бэлэмнэниилэр, оруолга киирии.

Валерий Аргунов, Суорун Омоллоон аатынан Опера уонна балет тыйаатырын артыыһа: "Сияющий камень” туруорууга кыттабын, аллараа дойду боотурун оруолун толоробун. Уһун кэмнээх бэлэмнэниибит түмүгүн көрдөрөбүт бүгүн". 

Бэстибээл "Сияющий камень" диэн туруоруурунан арыллар. Ураты тыыннаах этно-балет саха номохторугар-үһүйээннэригэр уонна ураты айылҕатыгар тирэҕирэн айыллан тахсыбыт. Уустук хореографиялаах, дьон көрөрүгэр олус чаҕылхай, киһини долгутар, умсугутар күүстээх туруорууну көрөөччү олус сөбүлээтэ.

"Бу “Сияющий камень” диэн 3 “Көмүс маасканан” наҕараадаламмыт туруоруу. Дойду биир биир бастыҥ испиктээкилинэн ааҕыллар. Онон бэстибээли бу этно-балетынан арыйыы тоҕоостоох ", - Мария Дмитриева, корреспондент

Быйылгы бэстибээл уһулуччулаах хореограф Юрий Григоровичка ананар. Онон кини "Лебелиное озеро", "Спартак",  "Ромео уонна Джульетта" аатырбыт балыттарын көрдөрүөхтэрэ.

Екатерина Тайшина, Суорун Омоллоон аатынан Опера уонна балет тыйаатырын сүрүн балетмейстера: "Кини бу испиктээкиллэрэр, биһиги эрэ тыйаатырбытыгар буолбакка, аан дойду бары тыйаатырдарын репертуарыгар баар уһулуччу туруоруулар". 

Балеттары сэргэ тыйаатыр үбүлүөйдээх сылыгар уһуллубут документальнай киинэ сүрэхтэниэ. Бэстибээл муус устар 26 күнүгэр диэри салҕаныаҕа. Нэдиэлэ устата салҕаммыт тэрээһин улахан гала кэнсиэринэн түмүктэниэ.