Киин куорат суолларыгар өрөмүөн салҕанар

Бу Ярославскай-Хабаров уонна Ефимов ааттынан уулуссалар силбэһиилэрэ. Манна светофорунан салаллар хамсааһын биир кэлим буолан толору оҥоһуллуохтаах. Билигин манна хаһыы үлэлэрин улахан анарын бүтэрэн, салгыы сир үлэлэрэ, итиэннэ коммуникация, чуолаан итии ууну ыытар турбалары көтөҕүү оҥоһуллуоҕа. Ыам ыйын оротугар диэри ити үлэлэри былаан быһыытынан бүтэриэхтээхтэр.  Ону тэҥэ, бу 203 түөлбэҕэ киирэр Ефимов уулуссатын капитальнай өрөмүөнүөхтэрэ, онон бу суол сабыллан турар. 

Александр Алексеев, "РИК-Автодор" тэрилтэ суол өрөмүөнүгэр учаастагын салайааччы : «Бу быһа охсууһуттан Ларионова уулуссатын кытта холбоһуохтаах. Икки балаһалаах буолар, икки хос аспааллаах, тротуардаах уонна уу ааһар лотоктардаах буолар».

Быйыл Дьокуускай үрдүнэн "Олоххо-дьаһахха аналлаах инфраструктура" национальнай бырайыак чэрчитинэн 8 суол саҥардыллыаҕа. Уопсайа 7 километр уһуннаах суол оҥоһуллуоҕа. Онтон 400-тэн тахса миэтэрэтэ саҥа суол, уоннааҕыта баар уулуссалары төрдүттэн саҥардаллар.

Григорий Новгородов, "Главстрой" тэрилтэ суол тутуутугар салайааччытын солбуйааччы: «Бу 8 эбийиэк бу сылга киирэллэр. 5 эбийиэк эһиил бүтэр».

Хабарова уулууссаҕа үлэлэр ааспыт сылтан ыытыллаллар. Манна Ярославскайтан Богатырев уулуссатыгар диэри 1,4 км кэриҥэ уһуннаах кэрчик суол капитальнай өрөмүөннэр. Хабаров уулуссатын өрөмүөнүн "РИК Автодор" тэрилтэ сүрүннүүр. Тэрилтэ өссө биир улахан эбийиэгинэн Сэбиэскэй Армия 50 сыла уулусса буолар. Күн ахсын манна улахан кыамталаах тиэхиньикэ үлэлиир.

Александр Алексеев, "РИК-Автодор" тэрилтэ суол өрөмүөнүгэр учаастагын салайааччы : «Сэбиэскэй Армия 50 сыла уулуссатыгар былырыыҥҥыттан үлэлии сылдьабыт. Леваневсай уулуссатыттан Бабушкинаҕа дылы оҥоробут».

Ойуунускай уулуссатыгар өрөмүөн үлэтэ эмиэ ааспыт сылтан тардыллар. Бу нэдиэлэ саҥатыттан манна айан-сырыы хааччахтанна. Ол курдук Дежнев уулуссатыттан Октябрьскайга диэри учаастакка суол аҥарын саптылар. Билигин манна эргэ аспаалын уһулан саҕалаатылар. Киин куоракка өрөмүөн үлэлэрэ ыытыллар кэмигэр ыытааччылары, сатыы сылдьааччылары суолларга учаастак хааччахтааҕын учуоттуулларыгар ыҥыраллар.