Дьокуускайга Дагестаҥҥа халаан уутуттан эмсэҕэлээбиттэргэ гуманитарнай көмөнү хомуйуу салҕанар

Бу курдук Саха сирин олохтоохторо ким да туора турбакка, Дагестаҥҥа уһун ардах кэннэ, ууга барбыт олохтоохторго көмөлөрүн хомуйаллар. Хас биирди малы наардаан, хомуйан бэлэмнииллэр. Дьон-сэргэ манна кэтэр таҥастан саҕалаан, бородууктааҕа тиийэ аҕалар.

Любовь Сунхалырова, Өксөкүлээх Өлөксөй аатынан норуоттар доҕордоһууларын дьиэтин методиһа: «Бастатан туран олоххо-дьаһахха туттуллар маллары, утуйар таҥас хомуйа сылдьабыт. Дьон олох олус көхтөөх, 45 позиция хомуйулунна. 100-тэн тахса киилэ мал аҕаллылар».

Көмө аахсыйаҕа биир бастакынан Дьокуускайга олорор, үлэлиир национальнай-култуурнай түмсүүлэр уонна диаспоралар кытыннылар. Татаар норуотун түмсүүтэ аҕыйыах кэм иһигэр хомуйан, наадалаах малы-салы аҕалан туттарда. Манан гуманитарнай көмөбүт тохтообот, өссө да көмөнү хомуйан туттарыахпыт диэн этэллэр.

Марат Гайнуллин, Татаар норуотун түмсүүтүн бэрэссэдээтэлин солбуйааччыта: «В прошлом году Якутии всем миром оказывали помощь, в этом году такое произошло в Дагестане. Мы все должны помогать».

Айдар Волков, Татаар норуотун түмсүүтүн кыттыылааҕа: «Мы планируем, чтобы это было быстро. Еще дополнительно наша община собирает».

Дагестан олохтоохторун алдьархайа бүтүн дойдуну түмтэ. Арассыыйа үрдүнэн, хас биирди региоҥҥа гуманитарнай көмөнү хомуйар пууннар арыллан, ким да туора турбакка бэйэтин көмөтүн оҥоро олорор. Күн бүгүн Дьокуускайга баар пууҥҥа 100-тэн тахса киилэ хомуллунна. Олохтоохтор, тэрилтэлэр, түмсүүлэр, биирдиилээн да дьон бэйэлэрин көмөлөрүн аҕала тураллар. 

Ньургун Иванов, Өксөкүлээх Өлөксөй аатынан норуоттар доҕордоһууларын дьиэтин үлэһитэ: «Быйыл Норуоттар сомоҕолоһуулар сылынан сибээстээн уонна уопсайынан Арассыыйа элбэх норуоттан турар буолан, ол иһин Дагестаҥҥа ууга барбыт дьоҥҥо күүс-көмө буолуохха наада. Саха сирэ хаһан да туора турбат, туох баар күүһүнэн көмөлөһө сатыыр».

Гуманитарнай көмөнү муус устар 19 күнүгэр диэри Өксөкүлээх Өлөксөй аатынан норуоттар доҕордоһууларын дьиэтигэр сарсыардаттан киэһээҥҥэ диэри туталлар. Онон олохтоохтору туора турбакка көмө аахсыйаҕа кыттыһаргытыгар ыҥыраллар.