АГАТУ саҥа гидропоннай теплицэтиттэн бастакы үүнүүнү ылла

Дьулустаан Тимофеев Агротехнологическай университет инженернай факультет АПК технолгическай системаҕа кафедратын лаборана. Бу быйыл сыл саҥата саҥа үлэҕэ киирбит гидропоннай теплицэни көрөр-истэр. Теплицэни икки дьоҕус кабинекка оҥорбуттар. Груун, буор наадата суох буолан аныгы материаллары туһанан оҕурсуну уонна помидору үүннэрэллэр. Сиэмэнэн тохсунньу бүтүүтэ олордубуттара номнуо бастакы үүнүүтүн биэрэн турар.

Дьулустаан Тимофеев, агропромышленнай комплекс технологическэй систиэмэҕэ кафедратын лабораана: «Базальт мат баар, ыраас, кубик иһигэр сиэмэ олоппуппут үүннэ».

Гидропоника бэйэтин көдьүүһүн бигэргэппит технология буолан чуолаан күүһү-сыраны, ууну экономиялыыр. Буор онннугар манна базальтан оҥоһуллубут минеральнай баата туттуллар, бу матырыйаал экология өттүнэн куттала суох.

Иван Тарасов, агропромышленнай комплекс технологическэй систиэмэҕэ кафедратын ассистена: «Уопсайа 120 оҕурсу уга баар, 4 суорта баар уонна 70 помидор уга».

Теплицэҕэ саамай сүрүнэ диэн салгын температуратын, сиигин тутуһуу буолар. Барыта авоматизированнай буолан оҕуруот аһын көрүү-истии судургутуйар. Оҕуруот аһа маннык усулуобуйаҕа түргэнник үүнэр, ситэр. Кутуллар уутугар уоҕурудууну туталлар.

Дьулустаан Тимофеев, агропромышленнай комплекс технологическэй систиэмэҕэ кафедратын лабораана: «Күн аайы 50 см үүнэр үөһээ, ону түһэрэбит уонна бытыктарын туурабыт».

Саха сирин уустук усулуобуйатыгар гидропоника технологиятын киллэрии кэскилээх суол диэн бэлиэтииллэр.

Иван Тарасов, агропромышленнай комплекс технологическэй систиэмэҕэ кафедратын ассистена: «Маннык гидропоннай теплицэҕэ хас да хайысханан үөрэх ыытыахха сөп. Студеннар практикаларын ааһаллар, үөрэнэллэр уонна наука чинчийии өттүнэн үлэ барыан сөп».

Буора суох оҕуруот аһын үүнннэрэр бырайыагы универистет ааспыт сылтан олоххо киллэрэр. Ол курдук университет көмөтүнэн Саха сиригэр аан бастакы бу маннык агролабораторияны  Мэҥэ Хаҥалас улууһун Матта нэһилиэгин оскуолатыгар аспыттара.