Быйыл балтараа тыһыынча ыал социальнай гаастааһыҥҥа хапсыа

Күүстээх тиэхиньикэ тоҥ буору холкутук алдьатар. Гаас үлэһиттэрэ социальнай гаастааһын бырагырааматынан Үрдүкү музыка оскуолатын чугаһыгар баар чааһынай дьиэлэргэ күөх төлөн тардаллар. Сүрүн утах эрдэ оҥоһуллубут. Онон билигин сайаапка быһыытынан көмөҕө тиксэр ыалга турбалары таһаартыыллар.

Социальнай гаастааһын бырагырааматынан дьыл кэмиттэн тутулуга суох сылы эргиччи үлэ барар. Оттон билигин халлаан сылыйан үлэ тэтимирдэ. Биир күн иһигэр бу ыалга гааска холбонор турбаны таһаарыахтара. Маныаха бөлөх үөрүйэхтээх хамсаныытыттан эмиэ улахан тутутуктаах. Көйүллүбүт тоҥ буору тута лапаакынан эбэтэр улахан тыраахтарынан бастаран иһэллэр.

Мичил Земляков, "Сахатранснефтегаз" АУо үлэһитэ: "Турба барар сирин хаһабыт. Гаас ситимин булабыт. Ол кэннэ силиэсэрдэрбитин уонна сыбааркылыыр бөлөҕү күүтэбит. Кинилэр гаас холбонор турбатын таһаараллар. Бу маны бүгүн хаһан бүтэрэбит уонна төптөрү көмөбүт, суолу мэһэйдээбэт гына". 

Ити куржук тэтимнээх үлэ билигин Хатаска, Саталга, Мархаҕа  итиэннэ бу музыка үрдүкү оскуолатын эҥээр социальнай гаастааһыҥҥа үлэ барар. Быйыл сүрүн тэрилтэ былааннаах үлэни бэйэтэ аҥаардастыы оҥоруо. санатан эттэххэ, урукку сылларга атын тэрилтэлэри наймылаһара. Дьокуускайы сэргэ улуустарга эмиэ улахан кээмэй оҥоһуллуо.

"Быйыл Саха сиригэр уосайа барыта 1500 ыал социальнай гаастааһыҥҥа хапсыа. Кинилэргэ сыл бүтүөр диэри күөх төлөн холбонуо", - Мария Дмитриева, корреспондент.

Санатан эттэххэ, социальнай гаастааһын бырагыраамата 2021 сылтан үлэлиир. Манна ким баҕар сайаапка түһэрэн чэпчэтиинэн туһанар кыахтаах. Сүрүн ирдэбил - гаас ситимэ тардыллыбыт буолуохтаах. Бырагырамма саҕаланыаҕыттан күөх төлөҥҥө 10тан тахса тыһыынча дьиэ холбонно. Үрдүк көрдөрүү 13 улууска уонна Дьокуускай куоракка бэлиэтэнэр.  Быйылгы сорук эмиэ инники сыллартан хаалбат. 

Алексеев Илларион, "Сахатранснефтегаз" АУо хапытаалынай өрөмүөн салаатын салайааччытын солбуйааччы: "Ол курдук быйыл биһиги уопсайа 47 килэмиэтир гаас турбатын тардыахтаахпыт. Сүрүн үлэ Дьокуускай куоракка барар уонна улуустарга. Ол курдук улахан үлэ Чурапчыга. Мэҥэ хаҥаласка, Миирнэйгэ ыытыллыа".

Маныаха икки өттүттэн ирдэбиллээх үлэ барар. Ол курдук гаас киллэттэрээччи олбуорун иһинээҕи үлэни бэйэтэ оҥоторор итиэннэ төлөбүрүн уйунар. Оттон күөх төлөн утаҕын тардыыны уонна тэлгэһэҕэ диэри кэлиитин гаас тэрилтэтэ хааччыйар. Үлэ саамай күүһэ сайын от  ыйыттан,  сир ирдэҕинэ буолуоҕа. 2030 сылга диэри дьиэлэр күөх төлөн ситимигэр 28 нэһилиэнньэлээх пууннарга холбонуохтаах диэн сорук турар.