Пасха иннинэ Дьокуускайдааҕы епархия биэкэрдэри кулич астыырга алҕаата

Килиэп дыргыл сыта кэмбинээти толорор.  Бу курдук быһыылаах, киэргэтиилээх кулич астаммыта 30-ча сыл буолла. Саамай сүрүнэ - амтана бу сыллар тухары уларыйбат. Пасха дьону сэргэни түмэр, дьиэ кэргэн үтүө үгэс гынар бырааһынньыга,  онон кулич амната эмиэ биир кэм буолуохтаах диэни кэмибинээт тутуһар.  

Людмила Максимова, Дьокуускайдааҕы килиэп кэмбинээтин лабораториятын салайааччы: "Биһиги куличтары ГОСТунан оҥоробут. Онон ырысыаба Сэбиэскэй Сойуус саҕаттан уларыйбакка турар. Ону барытын тутуһан астыыбыт". 

Ип-итии саҥа оһохтон тахсыбыт куличтар дьаарыстаналлар. Пасха кэмэ чугаһаата эрэ манна сыллата үлэ күөстүү оргуйар. Ким хостуур, ким үлүннэрэ уурарар, оттон сорохтор оһоххо угаллар. Сорук күүстээх 19 туонна кулич оҥоһуллуохтаах, онон биэкэрдэр хастыы да симиэнэҕэ көһөллөр. 

Үлэһиттэр  түбүктэрэ хас да бүк үрдээбитин аахсыбакка сибэтиэй бырааһынньыкка өрө көтөҕүллэн туран астыыллар. Маныаха кэллэктиип сүргэтин көтөҕүүгэ, күүстээх үлэҕэ кынаттыырга итиэннэ үтүө санаалаах астыырга Дьокуускайдааҕы епархия сыллата көмө буолар.

Пасха иннинэ үлэһиттэргэ анаан мэлиибэн ааҕыы үтүө үгэс, кэмбинээт епархияны кытта 10 тахса сыл бииргэ үлэлэһэр. Онон сыллата Дьокуускай олохтоохторо алҕаммыт куличтары сиир кыахтаналлар. 

Саргылана Скрыбыкина, Дьокуускайдааҕы килиэп кэмбинээтин генеральнай дириэктэрин солбуйааччы: "Быйыл үгэс буолбут куличтары уонна эксклюзивнай диэннэри астыыбыт. Биһиги куличтарбыт сүрүн уратылара диэн Дьокуускайдааҕы епархия алҕаабыта буолар. Биһиги биэкэрдэрбит иннигэр улахан күүстээх үлэ кэтэһэр".  

Кулич саҥа олох кэлиитин, иккистээн тиллиини кэрэһэлиир ас. Онон сырдык Пасха остуолун сүрүн киэргэлэ. 

Иеромонах Никандр (Горбатюк), Дьокуускайдааҕы епархия сэкирэтээрэ: "Кулич үйэлээх олоҕу кэрэһэлиир. Онон сыллата саҥа олоҕу астыыбыт. Аһытыыттан олус кыраһыабай ас буолан тахсар".

Үлэһиттэри алҕааһын кэннэ Иеромонах Никандр  бастакы куличтары киэргэттэ. Манан сорук туолла. Кэмбинээт Пасхаҕа астыырга толору бэлэм буолла. Быйыл оҥорон таһаарыыны өссө улаатыннарыахтара.

"Дьокуускайдааҕы килиэп кэмбинээтэ аҕыйах күҥҥэ уопсайа барыта 55 тыһыынча кулич астыаҕа. Оттон бу турар минньигэс килиэптэр өрөбүл күн Пасха остуолун киэргэтиэхтэрэ", -   Мария Дмитриева, корреспондент.

Онон хас биирдии ыал бырааһынньыктааҕы остуолугар кулич тиийдин диэн баскыһыанньа күн кытта астыахтара.