Дьокуускайга үлэтэ суох ахсаана икки бүк элбээтэ

Бүгүҥҥү күҥҥэ киин куоракка үлэтэ суоҕунан 1,5 тыһыынчаттан тахса киһи учуокка турарыттан, 900-тэн тахса киһи олох үлэтэ суох.  Аспыт сылы кытта тэҥнээтээххэ үлэтэ суох киһи ахсаана 51% элбээбит. Оттон үлэ миэстэтин туһунан этэр эбит буоллахха, 1,5 тыһыынча кэриҥэ вакансия баарыттан, улахан аҥаара оробуочай идэлэр.

Мария Слепцова, Дьокуускай куорат  нэһилиэнньэтин дьарыктаах буолууга киинин салайааччы: "Оробуочай идэлэри ылан көрөр эбит буоллахха, ордук электрогазосварщик, электромонтажник, асчыт, атыылааччы идэтигэр наадыйаллар. Оттон сулууспалаахтартан ордук быраастар, администратордар, силиэдэбэтэллэр, экономистар, бухгалтердар наадалар". 

Үлэ көрдөнөөччү кииҥҥэ кэлэн сайабылыанньатын "Работа в России" портал нөҥүө биэрэр, ол кэннэ киниэхэ тус куратор сыһыарыллан үлэ көрдүүрүгэр көмөлөһөр. Үөһээ Бүлүү улууһуттан төрүттээх Күннэй Герасимова икки сыллааҕыта үөрэҕин бүтэрбитэ, билигин идэтин үлэ көрдөнө кэлбит.

Күннэй Герасимова, үлэ көрдөнөөччү: "Бэйэм идэбинэн үлэ көрдөнөөрү уонна учуокка тураары  кэлбитим. Мин ниэп промышленноһыгар үөрэммитим, идэбинэн үлэ көрдүүбүн".  

"Моя работа" Дьокуускай нэһилиэнньэтин дьарыктаах буолууга киинигэр күннэтэ ортотунан 30 киһи сылдьар. Ким үлэ миэстэтин ыйыталаһар, ким учуоккка тураары, ким докумуон аҕалар, ким справка ыла кэлэр.

Зинаида Гуляева, Дьокуускай куорат  нэһилиэнньэтин дьарыктаах буолууга киинин инспиэктэрэ: "Үксүн 30 саастарыттан тахсыбыт дьон кэлэллэр. Номнуо тугу арыныахтарын баҕаралларын билэр, туох үлэтин көрдөнөллөрүн билэр дьон. 20-30 киһи күҥҥэ сылдьар сайабылыанньа биэрээри. Оттон учуокка биирдии бэйэбитигэр 100 тахсалыы киһи турар".  

Үлэ көрдөнөөччүгэ көмө быһыытынан саҥа идэ баһылырыыгар кыах биэрэллэр итиэннэ бэйэ дьыалатын арыйарыгар эмиэ көмөлөһөллөр.

Мария Слепцова, Дьокуускай куорат  нэһилиэнньэтин дьарыктаах буолууга киинин салайааччы: "Өрөспүүбүлүкэ бырагырааматынан уонна национальнай бырайыак чэрчитинэн үөрэххэ киирэллэр уонна бүтэрэллэригэр үлэнэн хааччыллаллар. Бэйэ дьыалатын арыныан баҕалаах дьоҥҥо эмиэ көмө оҥоробут".  

Маныаха дьону үлэ миэстэтинэн хааччыйыыга кэккэ тэрээһиннэр ыытыллаллар. Сотору кэминэн, кэлэр нэдиэлэ бүтүүтэ, Саха сиригэр үлэ дьаарбаҥкатын Бүтүн Арассыыйатааҕы түһүмэҕэ ыытыллыаҕа.