Быйыл Дьокуускайга 8 сиргэ суол оҥоһуллуо

Сэбиэсскэй Аармыйа 50 сыла уулуссаҕа өрөмүөн үлэтэ тэтимнээхтик барар.  Улахан тупсарыы үлэтин билбэтэх уулусса сорох аҥаара аны күһүн алтынньы ыйга тупсуоҕа. Күн ахсын манна улахан кыамталаах тыраахтардар үлэлииллэр.

Билигин бульдозер суолу хаспытын кэнниттэн кумах уонна гравий кутуллан олоҕо оҥоһуллуохтаах. Ол эрэн хаардаах уонна чалбахтаах буолан үлэҕэ мэһэйдэр үөскүүллэр. Сэбиэскэй Аармыйа 50 сыла  уулуссанан  улахан массыыналар сылдьар буолан түргэнник алдьанар. Ол иһин быйыл суол анныгар ууну  ыытар тимир турбалары ууруохтара. Бу суолу өр сылларга харыстыахтаах.

«Үлэһиттэр анал тиэхиньикэнэн солбуйса сылдьан түүннэри-күнүстэри үлэлииллэр. Бастаан эргэ суолу көтүрэллэр. Ол кэннэ саҥа буору кутан көннөрн тэҥнээн биэрэллэр», - Афанасий Канаев, корреспондент.

Суол өрөмүөнэ "Инфраструктура для жизни" национальнай бырайыак чэрчитинэн ыытыллар. Үлэ алтынньы ыйга диэри тохтоло суох барыаҕа. Быйыл Бабушкина уулуссаттан саҕалаан Леваневскай аатынан уулуссаҕа диэри аспаал ууруллуохтаах, онтон  Кальвицаттан Бабушкина уулуссаҕа  диэри суол олоҕо оҥоһуллуохтаах. Манна күн ахсын сүүһүнэн массыына сылдьар буолан үлэлииргэ ыарахан.

Александр Алексеев, "Автодор" хампаанньа өрөмүөнүнэн уонна тутуунан дьарыктанар салаатын салайааччыта: «Күн бүгүн биһиги тэрилтэ 4 хантараактаах. Ол курдук Сэбиэскэй Аармыйа 50 сыла уулусса, Хабаров аатынан уулусса, Ефимов аатынан уулусса уонна Ярославскай, Хабаров, Ефимов аатынан уулуссалар быһа охсуһуулара. Быһа охсуһууну оҥоруу уустуктардаах буолуоҕа, сайыны быһа суолу сабыахпыт». 

Суол өрөмүөнэ массыынанан сылдьар куорат олохтоохторугар саҥа кыһалҕалары үөскэттэ.  Ол эрэн  дьон-сэргэ аҕыйах сылынан көнө суолунан айанныахпыт диэн эрэнэллэр.

Дьон-сэргэ олоҕун хаачыстыбатын  тупсарар үлэ ыытыллара,  бу курдук нэһилиэнньэттэн хайҕаллаах эрэ. Мантан саас уонна сайын бу этиллибит кэрчиктэргэ үлэ өссө күүһүрүөҕэ.