Муус устар ый ураты көстүүтэ салҕанар

Сандал саас кэлбитин бастакы сибикилэрэ. Социальнай ситиминэн хоптону, кус-хаас көрбүттэрин дьон көхтөөхтүк таһаарар. Үүммүт муус устар ыйга салгын температурата орто көрдөрүүттэн үрдүк буоуло диэн сабаҕалыыллар. Ол курдук синоптиктар билгэлииллэринэн бу ыйга  2 кырдааһынан сылаас, ону тэҥэ элбэх сөҥүүлээх күн-дьыл туруоҕа.

Хаар сотору-сотору түһэр буолан киин куоракка үлэ күүһүрдүллүбүт эрэһииминэн барар. Күннэтэ, бөлөҕүнэн арахсан суоллары хаартан ыраастыыллар. Туһааннаах тиэхиникэ көмөтүнэн үлэ тэтимнээхтик барар. Күн бүгүн хаары ыраастааһынна 50 тиэхиникэ, 60-ча үлэһит  икки сменанан үлэлии-хамсыы сылдьар. Иннокентий Сиввцев муниципальнай дворнигынан үлэлээбитэ 8 ыйыгар барда.

Иннокентий Сивцев, Октябрьскай уокурук үлэһитэ: «Күүскэ үлэлии сылдьабыт. Кэлэктииппит үчүгэй буолан быйыл кыһыны быһа хаары кытта киирсэн таҕыстыбыт».

Куорат үрдүнэн санитарнай ырааһырдыы тэрээһинэ биллэриллэн бара турар. Уокуруктарынан салайар хампаанньалар, ТСЖлар, итиэннэ муниципальнай тэрилтэлэр күүстэринэн хаары, тоҥмут бөҕү-саҕы тиэйии-таһыы ыытыллар.

Валентин Эверстов, Октябрьскай уокурук салайааччыта: «Тэрилтэлэр бүгүҥҥү туругунан 6500 м³ хаар таһаардылар. Управляющай хампанньалар 11.5 тыһыынча, бэдэрээччиттэр 3 тыһ. хаар таһаардылар».

Хаары ыраастааһыны тэҥэ, суол үлэһиттэрэ көһө сылдьар паар тэрилин көмөтүнэн мууһурбут лотоктары ириэрэн уу ыытылларыгар бэлэмнииллэр. Күҥҥэ хас да аадырыһынан сылдьаллар. Сүрүннээн уу мустар сирдэрин бастакынан хабаллар. Бастаан лотоктар сабыыларын ылан уу барар сирин ыраастыыллар.

Алексей Ананьев, суол үлэһитэ: «Итии уунан, паарынан ыраастыыбыт».

Бу күннэргэ үгүс улуустарга кыра хаар, оттон соҕуруу диэки ардахтаах хаар түһэрэ күүтүллэр. Хоту улуустарга күүстээх тыаллаах күн-дьыл туруоҕа.