"Булуҥ" хаһаайыстыба таба ахсаанын элбэтиини күүскэ ылсар

Хоту дойду биир дьикти көстүүтэ. Кыараҕас сиргэ хаайтарбыт табалар, көмүскэнэн төргүрүччү эргийбитинэн бараллар. Эбээн Бытантай улууһун Саккырыырыгар  сааскы ахсаан саҕаланар.  Бу сырыыга икки улуус табаһыттара мустан учуоту ыыталлар. Эбээн бытантайдар харааллыыллар, оттон таба атыылаһа кэлбит булуҥнар, сөптөөх ахсааны арааран ылаллар.  

Дмитрий Шамаев, "Булуҥ" хаһаайыстыба табаһыта: "Таба араара 4 бураан буолан кэллибит. Уопсайа 600 табаны ылабыт. 300 бүгүн араардыбыт, аҥаарын сарсын арааран баран хамсыахпыт". 

Ыраах улууска баран, хааны уларытан, таба төрдө буолуохтаах кыыллары үчүгэйдик сыныйан ылаллар.  Атыыласпыт табаларыгар кулгаахтарыгар чип туруортууллар. Өрө мөхсө сылдьар табаны хоту дойду хоһуун эрэ дьоно кыайа тутар.

Юрий Попов, "Булуҥ" хаһаайыстыба табаһыта: "Кыралары эрэ ыллыбыт, кырдьаҕастары ылбатыбыт. Ол курдук тугуттар, мойокоолор, иитээттэр, тараҕайдар". 

Уһун кыһыны төһө ураа лаҥкы муостаах туораабыта учуоттанар. Маныаха табаһыттар үлэлэрин электроннай сканер чэпчэтэр. Бу тэрилинэн  чиптаах кыыллары ааҕарга судургу.  Итини сэргэ сибиир язватын утары быһыы туруораллар, бруцеллез диэн ыарыыга анализ ылаллар. 

Таисия Устинова, бэтэринээр: "Булуҥҥа барар табалары хаанныы кэлбиппит. Бу барыта бүттэҕинэ киэһэ өттүгэр, сывороткатын арааран бруцеллезка көрөбүт. Билиҥҥитэ барыта үчүгэй". 

Саха сиригэр күн бүгүн 160 тыһыынчаттан тахса таба баар. Ахсаан элбиир, кэнники 5 сылга 7% тахсыбыт. Маныаха "Булуҥ" хаһаайыстыба үтүө холобур буолар.  Төбө ахсаанын элбэтэр сыаллаах сыллата таба атыылаһар.  Дария Старостина салайааччылаах Эбээн Бытантай "Саҕах" диэн аҕа ууһуттан чуолаан мэнэйдэһэллэр. 

Руслан Лукин, "Булуҥ" хаһаайыстыба салайааччыта: "Саккырыырга үһүспүтүн кэллибит. 2022 сылга 450 төбөнү ылбыппыт, 2024 сылга 670 табаны атыыласпыппыт. Хаан уларыйан төрүөҕү үчүгэйдик ылыахпыт диэн эрэнэбит. Эбээн Бытантай улууһа табаҕа биир бастыҥ. Эдэр табаһыттара элбэҕэ. Онон биһиги табаһыттарбыт кинилэртэн холобур ыланнар, дьон хайдлах дьаһанан олорорун көрүөхтэрэ диэн сыалбыт биир көрүҥэ буолар". 

Таба иитиитигэр бастыҥ көрдөрүүлээх улуустар табаһыттара көрсөн, 3 күн бииргэ үлэлэһэн 600 төбө табаны арааран ыллылылар. Онон хадаар таастаах хайаларга төлөһүйбүт кыыллар муора кытылыгар аны олохсуйуохтара.

Василий Колтовской,  "Булуҥ" хаһаайыстыба табаһыта: "Барарбытыгар хоно-хоно айанныыбыт. Табаларбытын дьиэ аайы сынньата-сынньата айанныахпыт. Этэҥҥэ тиийээ инибит. Суобут үчүгэй". 

Суоллара уһун, этэҥҥэ буоллаҕына оруобуна биир ыйынан дойдуларын булуохтара.