“Саха сирэ” урутаан сайдыы сирэ-уота олохтоох оҥорон таһаарыыны сайыннарар

Килиэйи кутуу бу оҥорон таһаарыыга тутаах суолталаах. Ортотугар полистирол тутан, икки өттүнэн тимир лииһи силимнээн сэндвич-панель оҥоһуллан тахсар. "Саха сирэ" урутаан сайдыы резиденнэрэ бу матырыйаалынан тутуу ырыынагын хааччыйбыттара быданнаата. 

Григорий Бондарев, "Теплый край" тэрилтэ оҥорон таһаарар сыаҕын салайааччы: "Күҥҥэ ортотунан 500-600 кыбадыраатынай миэтэрэни оҥоробут. Билигин станокпутун улаатыннардыбыт. Онон күҥҥэ 1000 кыбадыраатынанй миэтэрэни оҥорорго бэлэмнэнэ сылдьабыт". 

Саҥа станок холоон көрүүнү ааһар. Эрдэ биир лииһи оҥорууга ортотунан 10 мүнүүтэ барар буоллаҕына, билигин толору автоматикаҕа көстөхтөрүнэ 2 эрэ мүнүүтэнэн  бэлэм буолар. Итини сэргэ минеральнай баатаны туһанан, олорор дьиэ эркиннэрин оҥоруохтара.  Урутаан сайдыы сирэ-уота олохтоох бэйэни хааччыныыны сайыннарар, онон хабар өрүтэ элбэх.

Ыалыы сыахха конвейер устун олохтоох оҥорон таһаарыы кутуллар. Манна мыылаттан, иһит сууйартан саҕалаан муоста сууйарга диэри бары көрүҥ оҥоһуллар. Күҥҥэ 2 туоннаҕа тиийэ бородууксуйа кутуллан, атыыга тахсар.

Вячеслав Афанасьев, "Сууйар" тэрилтэ генеральнай дириэктэрэ: "Оҥорон таһаарар кээмэйбит күнтэн күн улаатан иһэр. Дьон сөбүлээн ылар уонна сыанабыт да удамыр. Тиит хатырыгыттан оҥоһуллар бородууксуйаны таһаарар буоллубут. Тиит хатырыга бактерияны өлөрөр". 

Үһүс сылын үлэлиир тэрилтэ номнуо Саха сирин бүттүүнүн хабан үлэлиир. Онуоха бэйэ дьыалата сайдыытыгар урутаан сайдыы сирэ-уота тирэх буолар. Нолуокка уонна куортамҥа чэпчэтиилээх буоланнар күүстэрин ылалларыгар судургу.

“Саха сиригэр урутаан сайдыы сирэ-уота тэриллэн үлэлээбитэ 10 сыл буолла. Күн бүгүн 60 резидент үлэлиир. Уһук Илин сайдыытын корпорацията иһитиннэрэринэн, оҥорон таһаарыыөа 143 млдр. Солк. Угуллубут уонна 1000 кэриҥэ үлэ миэстэтэ тэриллибит”, - Мария Дмитриева, корреспондент.

Оттон бу инникитин пластик турба буолан тахсар матырыйаал кутуллар. "Эгопласт" тэрилтэ Саха сирин тымныытын аахсыбат, номнуо тургутан көрүүнү ааспыт турбалары оҥорор. Бу тэрилтэҕэ 40 тахса үлэ миэстэтэ тэриллибит. Оҥорон таһаары кээмэйэ итиэннэ көрүҥэ сыллата кэҥиир. 

Михаил Соловьёв, «Эгопласт» тэрилтэ генеральнай дириэктэрэ: "Тымныы ууга барар турбалары итиэннэ  саҥа турбалары оҥорор буоллубут. Олору итии ууга уонна гаас ситимигэр тутталлар". 

Быйыл 6 бастакы резидент үүнэн-сайдан урутаан сайдыы сириттэн-уотуттан таҕыста. Бу тэрилтэлэр өрөспүүбүлүкэҕэ бигэ туруктаах оҥорон таһаараачыылар буола үүннүлэр.