Харахха уустук эпэрээссийэни оҥоруу кэҥиир

Бу саҥа лазернай аппараат катарактаны уонна глаукоманы эмтиир, уустук эпэрээссийэни оҥорор кыахтаах. Бастакынан бу саҥа аппаратынан Горнай улууһун 93 саастаах олохтооҕор Елена Прокопьеваҕа катаракта эпэрээссийэтин ситиһиилээхтик оҥордулар. 

Елена Прокопьева, Горнай улууһун олохтооҕо: "Эпэрээссийэ олус түргэнник уонна ыарыыта суох оҥоһуллуна. Хараҕым арыый сырдаабыт курдук. Балыыһаҕа киирбэккэ, эпирээссийэ кэннэ бырааска көрдөрүнэн баран дьиэлиибит. Махтал буоллун быраастарга ".

Кэнники сылларга харах ыарыытын эмтииргэ сана аппарааттар кэлэннэр усулуобуйа тубуста, эмтииргэ, ыарыыны сэрэтэргэ, уустук эпэрээссийэлэри оҥорорго улахан кыах баар буолла. Оттон бу саҥа кэлбит аппараат элбэх өрүттээх чинчийиини оҥорор кыахтаах диэн быраастар этэллэр.

Пантелеймон Аргунов, СӨ харах балыыһатын диагностикалыыр киинин сэбиэдиссэйэ, офтальмолог-быраас: "Иккистээн үөскээбит катарактаны оҥорор. Ону таһынан глаукома уустук көрүҥнэрин эпэрээссийэлиир кыахтаах. Киһи олоҕо уһаата, онон сааһырар ыарыылар элбээтилэр. Харах эргэриитин утары охсуһабыт. ".

Харах балыыһатыгар сылга 10-тан тахса тыһыынча киһи сылдьан, эмтэниини ааһар. Быраастар күннэтэ 50-ча эпэрээссийэ оҥороллор. Маны сэргэ, балыыһа улуустары кытта ситимнээх үлэни ыытар. Бу саас Мэҥэ Хаҥалас улууһугар харах балыыһатын саҥа салаата арыллара күүтүллэр.

Пантелеймон Аргунов, СӨ харах балыыһатын диагностикалыыр киинин сэбиэдиссэйэ, офтальмолог-быраас: "Сотору кэминэн Мэҥэ Хаҥаласка филиал арыллыахтаах. Бу балыыһа Илин Эҥээри бүтүннүү хабыаҕа".

Быраастар ыраах тайаан сытар улуустары эмиэ хабаллар. Бу сыл саҕаланыыта  Эбэн Бытантайга, Үөһээ Халымаҕа уонна Дьааҥыга үлэлээбиттэрэ. Оттон бу ый бүтүүтэ Өлөөҥҥө, Аллараа уонна Орто Халымаҕа бараары бэлэмнэнэллэр.