"Кыл дорҕооно" диэн кырыымпа оскуолата арылынна

Кырыымпа алыптаах тыаһа, саха норуотун төрүт дорҕооно, түҥ былыргы сахабыт олоҕун-дьаһаҕын санатардыы дьиэрэйэр. төрүт үнүстүрүмүөммүт кыҥкынас тыаһа бу сырыыга ыччат дьон үөрэнээри түмсүбүтүгэр кутуллар. "Кыл дорҕооно" диэн кырыымпа оскуолатын аһыллыытын дьоро тэрээһинэ. Кэскиллээҕи түстүүр бырайыак Ил Дархан граанын сүүйэн олоххо киирдэ.

Мария Корнилова, А.П. Решетникова аатынан Саха сирин норуоттарын музыкатын уонна фольклорун түмэлин дириэктэрэ: "Биһиги түмэлбитигэр бүгүн олус үөрүүлээх күн. Ол курдук Ил Дархан көмөтүнэн кырыымпа оскуолата арылынна. Бу бырайыагы Култуурунай нэһилиэстибэ пуондата уонна биһиги түмэлбит көҕүлээтибит".

Сүрүн уһуйааччы Мичийэ Матвеева. Кини түҥ былыргыттан илдьэ кэлбит үнүстүрүмүөммүтүгэр оонньуон баҕалаах 10 ыччат дьону үөрэтэр. Манна кыра сааһыттан 35 диэри баҕалаахтар мустубуттар. Онон  аҥаардас музыка уруога эрэ буолбакка, төрүт үгэһи, дириҥ осторуойаны кытта билсии түһүлгэтэ олохтонор.

Мичийэ Матвеева - А.П. Решетникова аатынан Саха сирин норуоттарын музыкатын уонна фольклорун түмэлин үөрэтэр, сырдатар салаатын сэбиэдиссэйэ: "Бу бырайыак 3 ый устата ыытыллар, кулун тутартан ыам ыйыгар диэри. Ол эбэтэр хас ый аайы 10 оҕону хабан 3 ый устат уопсайа 30 ыччат үөрэниэҕэ. Сыл устата бырайыак чэрчитинэн сырдатар үлэ барыа".

Оттон "Кыл Дорҕооно" оскуолаҕа саҕалааччы кырыымпаһыттары сүүмрдээбиттэр. Онон хайдах үнүстүрүмүөнү сөпкө тһтһһттан саҕалаан дорҕоону таһаарыыга уһуйаллар. Арыллыы дьоро тэрээһинигэр  тута холонон көрдүлэр. Бастакы сырыы диэтэххэ бэрткэ табылынна. Оннооҕор кырачааннар хаалсыбатылар.

Бырайыакка анаан 30 кырыымпа ылыллыбыт. бу үнүстүрүмүөннэри олохтоох маастардар андрей осипов уонна руслан захаров оҥорбуттар.

Ольга Громова, А.П. Решетникова аатынан Саха сирин норуоттарын музыкатын уонна фольклорун түмэлин уһуйааччыта: "Бу бырайыак сүрүн сыалынан-соругунан буолар саха төрүт дорҕооннорун, төрүт үнүстүрүмүөннэрин, искусствотын үйэтитии, сайыннарыы, кэлэр кэнчээри ыччакка тиэрдии буолар".

Үөрэнээччилэр  аны сайын Туймаада ыһыаҕар кырыымпаһыттар күрэхтэригэр кыттыахтара. Кыайыылаах кырыымпа бэлэх тутуоҕа.