Кэнкэмэҕэ таба бырааһынньыга ыытыллынна

Кэлбит ыалдьыттар «Чичипкан» эбэҥки үгэһинэн эҕэрдэ, ыраастаныы сиэрин-туомун ааһаллар, таба этин, алаадьы амсайаллар. Кэнкэмэ сиригэр-уотугар Таба күнүн көрсө хоту улуустар бэрэстэбиитэллэрэ көхтөөхтүк муһуннулар. Ордук элбэх ыалдьыт ыраах Эдьигээн улууһуттан кэллэ.  

Хас биирдии делегация турар сирин ох курдук оҥостон бэлэмнээбит. Манна маастардар түүттэн, оҕуруонан тигиллибит ураты оҥоһуктарын туруордулар, урукку олох  мала-сала, иһитэ-хомуоһа дьон дьүүлүгэр таҕыста. Төрүт таҥас быстапката ураты болҕомтону ылла. Эдьигээнтэн төрүттээх, оҕо сааһа ыстаадаҕа ааспыт, Раиса Ильинова, төрүттээбит общинатын сиригэр-уотугар тэрээһин ыытыллан,  сүргэтэ көтөҕүллэн сылдьар. Эрдэ иитиэхтээбит баҕа санаам туолан олус үөрдүм диэн Раиса санаатын үллэстэр.

Раиса Ильинова, "Энэси халан" А.К. Ильинов аатынан община салайааччыта: “Табаны ылсыбытым үһүс сыла буолла. Муус устар 3 күнүгэр оруобуна 3 сыл буолар. Этэҥҥэ төрөөн-ууһаан тураллар. Хоту дьоно түмсүөхтэрин, биһиги ьбары бииргэбит диэн киэҥ эйгэҕэ таһаарыам диэн баҕарар этим”.

Ураа лаҥкыр муостаахтары Раиса Ильинова хааны уларытыыны сэргэ хотугу аҕыйах ахсааннаах норуоттар киин сиргэ түмсэр сирдэрин оҥорор сыаллаах тутар.  Бырааһынньык Саха сирин икки бэлиэ күннэригэр ананна. Арктика уонна табаһыт күннэригэр. Сүрүн сыал-сорук  төрүт эбэҥки үгэһин сөргүтүү, кэлэр көлүөнэҕэ уопуту үллэстии. Билиҥҥи кэмҥэ былыргы үөрүйэхтэр умнууга хаалан эрэллэр, онон кырдьаҕастартан сүбэ-ама ылан тэнитии ирдэнэр.

Татьяна Софронова, Эдьигээн улууһун олохтооҕо: “Хаппыт балык буорса диэн ааттаах. Ону тэҥэ тоҥ, туустаах балыктар бааллар. Итиэннэ дойдубут отонноруттан барыанньалар”. 

Төрүт ас эгэлгэтэ кэлии ыалдьыттары сөхтөрөр. Хоту деликатес баай көрүҥэ - сибиэһэй балык, таба этэ, отон арааһа бырааһынньык сүрүн киэргэтиитэ, көстүүтэ.   Таба күнүн көрсө атын регионнартан туристар кытта кэлбиттэр.

Олеся Сердюк, Москва уобалаһын олохтооҕо: “3 сөмөлүөтүнэн көтөн кэллим бу бырааһынньыгы көрөөрү. Ыарахаттары туораан кэллим. Уонна манна кэлбиппиттэн олус диэн үөрэн турабын”.

Һээдьэ үҥкүүтэ мустубут араас норуоттары бииргэ түмтэ. Эбээннэр, долганнар,юкагирдар, чукчалар, сахалар,нууччалар илии-илиилэриттэн ылсан биир эргииргэ киирдилэр. Ону тэҥэ бырааһынньык саамай тыҥааһыннаах түһүмэҕинэн спортивнай оонньуулар буоллулар. Наартаны нөҥүө ойуу, үс төгүл ыстаҥа, маамыктаны быраҕыы хоту киһи сатабылын, кыаҕын туругурдар. Таба бырааһынньыга аҥаардас көрсүһүү эрэ быһыытынан буолбакка, урукку уонна инники кэм дьүөрэлэһиилэрин, хоту тыйыс Арктика сылаас куттаах норуотун олоҕун кэрэһэлиир, сомоҕолуур түһүлгэтинэн буолла.