Халлаан быйыл эрдэ сылыйбыт

"Якутдорстрой” хампаанньа үлэһиттэрэ сквердэри, тротуардары, болуоссаттары хаартан ырастыыллар. Кыһыны быһа мунньуллубут хаары хомуйан, биир сиргэ чөмөхтөөннөр, полигоҥҥа тиэйэллэр. Бастатан туран, үлэ киин куорат ортотугар, дьон хаамар сирдэригэр бара турар.

“Таһырдьа сылыйан дьон күүлэйдии тахсар. Маныаха бадараан буолбатын диэн үлэһиттэр күүскэ хаары ыраастыыллар ”, - Афанасий Канаев, корреспондент.

Өрөспүүбүлүкэ үрдүнэн сылаас күннэр саҕаланнылар, күнүһүн температруа 5 - 10 кыраадыска тиийэ сылыйыан сөп, ол эрэн түүнүн тоҥоруоҕа. Күнү-дьылы кэтээн көрөр сулууспа иһитиннэринэн, быйыл ааспыт сыллардааҕар сылыйыы эрдэ кэллэ, ортотунан ылан көрдөххө 5 кыраадыһынан үрдүк.

Саргылаана Никитина,  Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: “Кулун тутар 25 күнүгэр сөҥүү түһэрэ күүтүллүбэт. Күнүскү температура 0-2 кыраадыс буолар. Оттон 26 кыра хаардаах буолуо. Күнүс 4 диэри сылыйыа”.

Күнүһүн сылаас түүнүн тоҥорор онон суолга халтараан үөскүүр. Аҥаардас 3 күн иһигэр 36 суол быһылаана таҕыста. Хомойуох иһин, биир киһи суорума суоланна. Бүгүҥҥү күҥҥэ халтараантан сылтаан "Лена" федеральнай трассаҕа айан уустуктардаах, халтараан суолтан сылтан хас эмэ кэрчиктэринэн массыыналар хаайтараллар.

Филипп Тырылгин,СӨ ИДьМ суолга куттал суох буолуутун хааччыйар иниспиэксийэтин сырдатар-тарҕатар салаатын иниспиэктэрэ: “25 итирик суоппар тутулунна. Онтон иккитэ иккистээн түбэстилэр. Кинилэр холуобунай эппиэтинэскэ тардыллаллар”.  

Уһун кыһын кэннэ - уһуктуу. Куорат олохтоохторо сибиэһэй салгынынан тыына, куорат устун дьаарбайа тахсаллар. Ордук болуоссаттарынан, былаһааккаларынан күүлэйдииллэр.

Оттон муус устар 1 күнүттэн өрөспүүбүлүкэҕэ кыһыҥҥы өрүс суолларыгар уйугу намтатан саҕалыахтара.  Ол курдук тырааныспар ыйааһына 30 туоннаҕа диэри намтыаҕа. Онтон муус устар ый 15 күнүттэн кыһыҥҥы суоллар сабылллыахтара.