Оҕолорго ГАИ оскуолата үлэлээтэ

Дойду өрөгөйүн ырыата тыаһаан, былаах киллэриллэн 29 төгүлүн суол- иис билимин дьоҕус академиятын үөрэҕэ  арыллар. Бу күн "Бэс чагда" оҕо сынньанар киинигэр ыраахтан-чугастан, 12 улуустан "эдэр иниспиэктэрдэр" кэллиллэр.

Саха өрөспүүбүлүкэтин суолга куттал суох буолуутун хааччыйар иниспиэксийэ бэрэстэбиитэллэригэр рапорт бэриллэр. Уопсайа 4 батальон, ол эбэтэр 48 эдэр иниспиэктэр араас улуустартан муһуннулар. Бу тэрээһин суолга куттал суох буолуутун хааччыйар иниспиэксийэ уонна үөрэх министиэристибэтин биир сомоҕо үлэлэринэн буолар.

Афанасий Фёдоров, СӨ үөрэҕириигэ уонна наукаҕа министиэристибэтин кылаабынай исписэлииһэ: "Бу сыл аайы ыытыллар тэрээһин. Оҕолор манна саҥа билии, үөрүйэх ылаллар. Маны таһынан саҥа доҕоттордонуохтара. Инники идэлэрин да булуохтарын сөп".

Бүлүү улууһуттан, "Кэскил" оҕо дьоҕурун сайыннарар киинтэн,  кэлэ сылдьар 8 оҕоттон турар хамаанда, оройуоннарыгар бастыҥ буолан манна кэлэр чиэскэ тиксибиттэр. Кинилэр Бүлүү куоракка суолга куттал суох буолуутун хааччыйар иниспиэксийэни кытары ыкса үлэлэһэллэр.

Мария Фёдорова, Бүлүүтээҕи "Кэскил" оҕо дьоҕурун сайыннарар киин уһуйааччыта: "Көмөлөһөллөр, кэлэннэр араас хабааннаах кэпсэтиилэри ыыталлар. Ону сэргэ иниспиэктэрдэри кытта суоппардары бэрэбиэркэлээһиҥҥэ тахсабыт".

Үөрүүлээх арыллыыга суолга куттал суох буолуутугар туруулаһан туран үлэлиир дьоммут, улуустар бэрэстэбиитэллэрэ кэлэн оҕолорго алгыс тылларын этиллэр. Эдэр иниспиэктэрдэри уруйдаатылар.

"оҕо сынньанар киинигэр оҕолор 10 күн устата араас дьарыктары,үөрэхтэри, маастар-кылаастары ааһыахтара. Сулга куттал суох буолуутугар туһуламмыт күрэхтэргэ кыттыахтара", - Анастасия Добрянцева, корреспондент.

Онтон маннык тэрээһин эдэр көлүөнэ исписэлиистэри бэлэмнииргэ туһуланар. ГАИ иниспиэктэрдэрин оҕолорго туһуламмыт үөрэҕэ 1997 сыллаахтан ыытыллар.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: "Бастаан улуус таһымыгар күрэх буолар. Онно бастакы суһал көмөнү оҥорууну, суол быраабылатын билиини уонна бэлисипиэти сөпкө ыытыыга күрэхтэһэллэр. Ол кэннэ кыайыылаахтар өрөспүүбүлүкэ түһүмэҕэр кытталлар. Манна үчүчгэй көрдөрүүлээхтэр дойду таһымнаах күрэххэ барыахтара".

Кыра эрдэхтэн суолга куттал суох буолуутугар үөрэтии  инники күөҥҥэ. Эһиил оскуола  30 төгүлүн аанын тэлэччи арыйыаҕа.