Библиотека үлэһиттэрин семинара ыытыллар

Үгэскэ кубулуйбут семинарга быйыл хаһааҥҥытааҕар да элбэх кыттааччы кэллэ. Кыттааччылар бу күннэр устата библиотека сайдыытын, инникитин торумнаһыахтара.  Сүрүн болҕомто төрөөбүт дойдуга тапталы иитиигэ, оҕо төрүт тылынан ааҕар кииннэрин тэрийии тула кэпсэтиэхтэрэ.

Любовь Боярская, СӨ национальнай библиотекатын сүрүн үлэһитэ: "Исписэлиистэрбит олус көхтөөхтөр. Бэйэлэрин табыллыбыт бырайыактарын аҕалан кэпсээтилэр. Тыын, кыһалҕалаах боппуруостары олорон эрэ ырытыһабыт, быһаарар ньыманы тобулабыт".

Семинар кэмигэр кыттааччылар ааспыт сыл ситиһиилэрин кэпсээтилэр, саҥа бырайыактарын билиһиннэрдилэр. Хас биирдии улуус библиотеката төрүт тылы харыстааһыҥҥа, тарҕатыыга туһуламмыт элбэх бырайыактаах.

Изабелла Жиркова, Сунтаар улууһун киин библиотекатын дириэктэрэ: "Саха тылын харыстааһын бырагырааматынан үбүлээһин барыахтаах. Үөрэрбит диэн, улуусмтарынан буолбакка бөлөхтөрүнэн көрүллэр. Холобур, Бүлүү бөлөххө туһунан көрүллэр. Саамай тоҕоостоох кэмҥэ үлэ ыытыллан эрэриттэн наһаа үөрэбит".

Мэҥэ Хаҥалас улууһун библиотеката өрөспүүбүлүкэ биир саамай улахан уонна элбэх салаалаах библиотекатынан биллэр. Күн бүгүн улууска 31 библиотека биир ситимнээхтик үлэлии олорор. Сылын аайы  үлэһиттэр саҥа бырайыактары олоххо киллэрэллэр. Былырыын Кыайыы 80 сылыгар анаммыт бырайыак киэҥ хабааннаахтык, үрдүк таһымнаахтык барбыт.

Марианна Никанорова, Мэҥэ Хаҥалас улууһун киин библиотекатын дириэктэрэ: "Ааспыт 2025 сылга биһиги  Кыайыы 80 сылын көрсө “Мэҥэ хаҥалас улууһа Аҕа дойду Улуу сэриитин сылларыгар” диэн 34  томнаах уосастыбаннай-политическай хабааннаах кинигэ таһаарбыппыт. Кинигэбит барыта архыып докумуоннарыгар олоҕуран тахсыбыта. Бу кинигэбит Россия библиотекаларын ассоциацияларын күрэҕэр бастыҥ муниципальнай библиотека таһаарыыта диэн наҕарааданы ылбыта".

Сыллата ыытыллар семинар-мунньахха библиотека үлэһиттэрэ көрсүһүү,  үөрэнии эрэ буолбакка уопут атастаһыы, сүрүн кыһалҕаларын, сытыы боппуруостарын дьүүллэһэллэр.

Прокопий Прокопьев, Амма улууһун киин библиотекатын дириэктэрэ: "Өрөспүүбүлүкэ библиотекаларын сүрүн кыһалҕата эбийиэктэрбит эргэриилэрэ буолар. Онон бу өттүгэр болҕомто ууруллара буоллар диэн этэбит. Тоҕо диэтэр кинигэ баар - бараммат баай буоллаҕа. Биһиги кэннибититтэн хааларбыт кинигэ эрэ ".

Мунньах нэдиэлэ устата ыытыллар. Бырагыраама олус киэҥ, көрсүһүүлэри, мунньахтары таһынан, кыттааччылар идэни үрдэтии кууруһун ааһыахтара.