"Абилимпикс" диэн үлэ таһымын тургутар күрэх саҕаланна

Дьокуускайдааҕы медицинэ коллеһа "Абилимпикс" күрэхтэһиини 2019 сыллаахтан ыытар. Быйыл номнуо 8 сылын чемпионат сүрүн былаһааккатын быһыытынан үлэлиир. Үөрэх кыһатыгар бүгүҥҥү күҥҥэ 2 тыһыынчаттан тахса устудьуон үөрэнэр, онтон 50-тан тахсата инбэлииттээх.

Светлана Михайлова, "Абилимпикс-2026" күрэх кыттыылааҕа: "Бу доруобуйаларыгар хааччахтаах дьоҥҥо олус үчүчгэй күрэх. Манна бэйэбитин уонна учууталларбытын көрдөрөбүт. Кинилэр туох билии биэрбиттэрин көрдөрүү түмүгэ буолар". 

Саха сиригэр "Абилимпикс" регионнааҕы чемпионатыгар уопсайа 400-тэн тахса доруобуйаларыгар хааччахтаах оскуола үөрэнээччитэ, устудьуон, исписэлиис бу күннэртэн кыттан саҕалыаҕа. Күрэхтэһии бу нэдиэлэ устата араас үөрэх кыһаларын былаһааккаларыгар ыытыллар. Ренат Матвеев Глобальнай үөрэҕирии киинин 10 кылааһын үөрэнэээчитэ. Ренат "Фелдьдшер" хайысхаҕа бэйэтин билиитин холоон көрүөҕэ.

Ренат Матвеев, "Абилимпикс-2026" күрэх кыттыылааҕа: "Мин инникитин медбрат буолуохпун баҕарабын. Бу күрэххэ миигин учууталым суруттарбыта. Ол иһин мин манна кытта сылдьабын".

Оскуола үөрэнээчилэригэр куонкурус идэни талыыга туһуланар. Күрэх араас идэлэринэн ыытыллар, ол курдук манна кулинарияттан архитектураҕа диэри хайысхалар киирдилэр. Медицинэ коллеһа 7 компетенциянан кыттааччылары түмтэ, кинилэр 12 категорияҕа арахсан күрэхтэһэллэр.

Сарыал Яковлев, "Абилимпикс-2026" күрэх кыттыылааҕа: "Бу күрэххэ иккистээн кыттабын. Былырыын 3 миэстэ буолбутум".

Бастакы күн колледж устудьуоннара кэлбит дьоҥҥо анаан идэлэринэн маастар-кылаастары көрдөрдүлэр. Манна массажтан саҕалаан тиис протеһын оҥоруутун көрдөрөллөр. Холобур, бу хаан ханнык бөлөххө киирсэрин быһаараллар.

Лилия Кононова, Дьокуускайдааҕы медицинэ коллеһын устудьуона: "Хааны кутарга бу курдук анал планшеттары туттабыт. Уонна суурадаһын кутан быһаарабыт".

Тэрээһин чуолаан инбэлиит дьон идэ ылалларыгар, үлэ булалларыгар көмө буолар.

Павел Фёдоров, "Абилимпикс-2026" күрэх эксперэ: "Үлэ таһымын үрдэтэр сыаллаах-соруктаах күрэх. Ол иһин манна кыттыбыт оҕолор үөрэххэ киирэллэригэр да үчүгэй буолар итиэннэ саамай туһалааҕа үлэ булларыгар көмөлөөх".

Күрэхтэһээччилэри экспердэр уонна үлэ биэрээччилэр сыаналыыллар. Түмүккэ кыайыылаахтар финалга киирэн, Россияҕа баран идэлэрин маастарыстыбатын, үөрүйэхтэрин бүтүн дойду таһымыгар үрдэтиэхтэрэ, итиэннэ тустаах сертификат тутуохтара.