Мууска сэрэхтээх буолуу ыйынньыга саҕаланна

Таһырдьа улам сылыйан киин куоракка дьон сырыыта үксүүр. 202 дьоҕус түөлбэҕэ турар муус пааркатыгар номнуо сарсыардаттан ыалдьыттар бааллар. ГИМС иниспиэктэрдэрэ бу күн мууска сэрэхтээх буолууга туһуламмыт сэрэтэр үлэлэрин ыыттыллар.

Сыллата муус пааркалара, хаҥкылыыр сирдэр арылыннахтарына тустаах биэдэмистибэ үлэһиттэригэр үлэлэрэ икки бүк үрдүүр. Муус эбийиэктэригэр дьон-сэргэ, чуолаан оҕо-аймах, араас таһымнаах эчэйиилэри ылыахтарын сөп. Ол иһин ону уҕарытар сыаллаах-соруктаах маннык тэрээһин ыытыллар. Маныаха сүрүн болҕомто балыксыттарга ууруллар.

"Иниспиэктэрдэр мууска сэрэхтээх буолуу туһунан сэрэтэр иһитиннэриини ыыталлар. Оттон истээччилэр сэрэтиини ылыммыттарын мэктиэлээн илии баттыыллар. Маннык тэрээһин күннэтэ ыытыллар", - Анастасия Добрянцева, корреспондент.

Сааскы ылааҥы күннэри баттаһа Чурапчыттан төрүттээх Гаврил Луковцев этин-сиинин чэбдигирдэр. Өлүөнэ эбэ уутугар умсубута 3 сыла буолбут. Нэдиэлэҕэ иккитэ-үстэ кэлэн ууга умсабын диэн кэпсиир. Сөтүөлүүр ойбон ирдэбилгэ эппиэттиирин тоһоҕолоон этэр.

Гаврил Луковцев, Дьокуускай куорат олохтооҕо: "Ойбон дириҥэ 1,5 миэтэрэ баара буолуо. Алын өттүгэр куораптаах, онон туох да куттала суох. Муус быраабылаларын күһүн саас ордук күүскэ тутуһабыт".

Маны кытары ГИМС иниспиэктэрдэрэ улахан болҕомтолорун хаҥкылыыр сирдэргэ уураллар. Манна эмиэ нэһилиэнньэни кытары сэрэтэр кэпсэтиилэр ыытыллаллар.

Татьяна Степанова, ЫБММ СС ууга куттал суох буолуутун хааччыйар салаатын салайааччытын солбуйааччы: "Күн бүгүн уопсайа барыта 26 маассабай хаҥкылыыр сир баар. Бүгүн ГИММ иниспиэктэрдэр Дьокуускай эргин хаҥкылыыр сирдэри кэрийдилэр. Сынньанааччылары кытта мууска сэрэхтээх буолуу туһунан сэрэтэр кэпсэтиилэри ыыттылар ".

Билигин өрөспүүбүлүкэ үрдүнэн 43 муус суола үлэлии турар. Онтон 6 федеральнай таһымнаах, 4 өрөспүүбүлүкэ, 33 улуус таһымнаах аартыктар. Бу хайысхаҕа үлэ барар.