Байыастарга көмөнү оҥоруу тохтообот

"Саха сирэ эйиигин кытта!" общественнай түмсүү 2022 сылтан ыла тиһигин быспакка үлэлиир. Бүгүҥҥү күҥҥэ уонунан волонтер баҕа өттүнэн күүс-көмө буолар.77 саастаах Надежда Иванова   ыстаабка үлэлээбитэ үһүс сыла. Иллэҥ кэмигэр кэлэн манна көмөлөһөр. Күннэтэ ыстаапка түбүк тиһигин быспат, баһыылка хомуйуута, наардааһына, иистэнии. 

Надежда Иванова, волонтёр: "Дойдуга ыарахан балаһыанньа тирээбитигэр барбыт уолаттарбытыгар, манна хаалбыт дьон тугунан эмэ көмөлөһөр санаалаах дууһабыт этиитинэн кэлэн сылдьабыт".

Бу күннэргэ номнуо 400 киилэ таһаҕас хомуллан тирэх пууннарга айаннаата. Тэрилтэлэртэн, биирдилээн дьонтон кыра да буоллар күннэтэ көмө кэлэр. Ол эрээри анал байыаннай форма тигэллэригэр матырыйааллара бүтэн, таҥас кырадаһыныттан, ордугуттан бытархай наадалаах таҥаһы-сабы тигэргэ күһэллэллэр.  

Дария Яковлева, волонтёр: "Матырыйаалбыт барыта бүттэ. Көстүүм тигэр таҥас олох суох. Онон бытархай сээкэйдэри тигэбит". 

Ол курдук бэргэһэ, ис-таҥас тохтоло суох тигиллэ турар. Ону тэҥэ маннык 5 харах харысхал шеврон эмиэ күннэтэ бэчээттэнэр, тыһыынчанан устуука оҥоһуллан тахсар.

Уустук балаһыанньа үөскээн түмсүү чааһынай эргиэмсиктэртэн, тэрилтэлэртэн матырыйаалынан көмөлөһөргө ыҥыраллар.

Анна Ефимова, "Саха сирэ эйиигин кытта!" общественнай түмсүү бэрэссэдээтэлэ: "Байыастар көмө ылаары ыстаапка кэлэ тураллар, ону биһиги билигин көстүүм биэрэр кыаҕа сох олоробут".

Матырыйаал кэллэҕинэ сыахха ичигэс кыһыҥҥы байыаннай форма уонна мантан кэнники сылыйдаҕына сайыҥҥы форма тигиитэ күүтүллэр. Ону тэҥэ, ас-үөл, балык, эт кэлбитин астаан баһыылка бэлэмнииллэр. Марха олохтооҕо Аркадий Иванов кэргэнин батыһан волонтер буоларга санаммыт.

Аркадий Иванов, волонтер: "Массыыналаах буоламмын тиэйэр-таһар үлэҕэ сылдьабын. Итиэннэ сиэккэ өрүүтүгэр көмөлөһөбүн. Уолаттар дроннартан, өлөрөр-өһөрөр сэптэртэн харыстанныннар диэн өрөбүт".  

Общественнай ыстаапка таҥас-сап, баһыылка тирэх пууҥҥа тиийэр. Маны тэҥэ таһаҕас сорҕотун кэккэ куораттарга баар байыаннай госпиталларга, тирэх пууннарга ыыталлар, онтон салгыы байыаннай чаастарга тарҕанар.