Анал байыаннай дьайыы кыттыылаахтарын бэйэ дьыалатын арыныыга үөрэтэллэр

Быйылгы үөрэххэ барыта 29 кыттааччы кэлэн, үөрэҕин саҕалаата. Бу үөрэх анал байыаннай дьайыы кыттыылаахтара уонна кинилэр дьиэ кэргэттэрэ бэйэ дьыалаларын тэринэн, урбаан эйгэтигэр бастакы хардыы оҥороллоругар төһүү күүс буолуоҕа. Үөрэх биэс күн устата ыытыллар, бырагыраамата олус киэҥ. Бу кэм устата кыттааччылар бэйэлэрин бырайыактарын суруйан, көмүскүөхтэрэ.

Анна Филиппова, тэрийээччи: "Бэйэлэрин бизнес бырайыактарын суоттаан-учуоттаан, оҕолуу бүөбэйдээн таһаарыахтаахтар. Ол аата кинилэр урбаанньыт буолалларыгар бу бырайыак туһаҕа туруохтаах".

Миирнэй оройуонуттан сылдьар, анал байыаннай дьайыы кыттыылааҕа, бэтэрээнэ Вячеслав Данилов инникитин дойдутугар туризм эйгэтин сайыннарар былааннаах.

Вячеслав Данилов, анал байыаннай дьайыы кыттыылааҕа: "Биһиэхэ бу кыахтаах өйөбүл. Бырабыыталыстыбабыт өйөөн бу үөрэнэ сылдьабыт".

Айсен Керемясов былырыын сулуспалаан кэлээт, үрдүк үөрэххэ туттарсан киирбит. Үөрэҕин таһынан бэйэ дьыалатын арынарга санаммыт.

Айсен Керемясов, анал байыаннай дьайыы кыттыылааҕа: "Маннык үөрэтэр бырайыкка бастакыбын кыттабын. Кофе атыылыыр аппараат дьыалатын арыйыахпын баҕарабын. Уопсайынан бу эйгэҕэ бэйэбин холонон көрүөхпүн баҕарабын".

Ленскэйтэн кэлэ сылдьар Прокопий Никонов бэйэ дьыалатын арынан үлэлэтиэн баҕарбыта ыраатта. Кини атыы-эргиэн хайысхатыгар бэйэтин холонон көрөөрү гынар.

"Урбаан эйгэтигэр улахан уопутум суох, ол эрэн баҕа санаам улахан. Бу үөрэх тус бэйэбэр көмөлөһүө", -  анал байыаннай дьайыы кыттыылааҕа Прокопий Никонов диэн этэр.

Үөрэх нэдиэлэ устата барар. Кыттааччылар бэйэлэрин бырайыактарын бэлэмнииллэрин таһынан, араас интэриэһинэй көрсүһүүлэргэ, маастар-кылаастарга кыттыахтара. Улахан биллэр тэрилтэлэргэ сылдьан үлэлэрин кытта билсиэхтэрэ, сүбэ-ама ылыахтара.