Горнай улууһа бары хайысханы тэҥҥэ тутан сайдар

Олохтоох хирургтар ситиһиилэрэ. Уустук тостууну кэмигэр сөптөөх эпэрээссийэ оҥороннор кылгас кэм иһигэр ыарыһах этэҥҥэ оспут. Билигин уҥуоҕу тутар аппараатын уһуллулар, инникитин чөлүгэр түһэрии күүтэр.

Иван Оконешников, эмтэнээччи: "Ааспыт күһүн илиибин тоһуппутум. Кэбээйигэ балыыһабыт өрүс уҥуор, ол иһин манна кэлбитим. Тута эпэрээссийэлээбиттэрэ". 

Горнай улууһугар хирургия салаата Саха сиригэр биир тарбахха баттанар сайдыылаах. Ааспыт сыл манна тобук уҥуоҕар эндпротезирование кытта оҥоһуллан саҕалаабыта. Быйыл улууска Доруобуйа сыла. Онон бу салааҕа болҕомто өссө күүһүрэр. Маны тэҥэ лаборатория  чинчийэр кыаҕа эмиэ кэҥиир. Бу сайын саҥалыы өрөмүөннэниэ.

Любовь Захарова,  Горнай киин балыыһатын фельдшер-лабараана: "Сүрэх быччыҥнарын кэһиллиитин быһаарар тэрил. Инфаркт, инсульт курдук ыырыыларга олус туһалаах, түргэнник диагноз туруорарга олус көмөлөөх". 

Горнай киин балыыһата улуус нэһилиэнньэтин эрэ буолбакка аттынааҕы Кэбээйи, Бүлүү дьонун-сэргэтин эмиэ көрөр. Холобур, ааспыт сылга уопсайа 60 тыһыынчаттан тахса киһи көрдөрүммүт, эмтэммит.

Ыраас иһэр уу - доруобуйа төрдө. Бэрдьиэгэстээххэ сыл саҥатыттан ууну ыраастыыр станция арыллан үлэлиир. Баараҕай тутуу уопсай дьиэлэри хааччыйар итиэннэ чааһынай дьиэлэргэ бодобуос күннэтэ  ыраастыммыт ууну таһар.

Сергей Иванов, ууну ыраастыыр ыстаансыйа салайааччыта: "Сууккаҕа 150 кууб ууну ыраастыыр. Инникитин 300 куубка тириэрдэр былааннаахпыт".

Станция кыамтатын өссө улаатыннарыахтара итиэннэ быйыл ыраас ууга өссө Эбэ Түөлбэ 100 ыала холбонуо.

Горнай улууһа бары хайысханы тэҥҥэ тутан сайдар. Бастыҥ көрдөрүүлээх оройуон биир сүрүн хайысхата - айар-тутар экономика. Манна  талба талааннаахтар, илиинэн, мындыр толкуйунан оҥорон таһаарааччылар түмсэн дохуот киллэрэр салааны сайыннараллар.

Вероника Быганова, Горнай улууһун култуураҕа уонна духуобунай сайдыыга салалтатын салайааччыта: "Быйыл Ытык сирдэри үөрэтиигэ харчы көрдүбүт. Ол чэрчитинэн Маҕараска, Мытаахха археологическай хаһыылар буолуохтара. Ону сэргэ хас биирдии нэһилиэк “Ытык сирдэр” бырайыакка кыттыһан үлэлиэхтэрэ".

Горнайга креативнай экономиканы сайыннарыы сүрүн тирэҕэ - биллиилээх модельер Августина Филиппова айар үлэтэ.

"Августина” култуурунай-туристическай маршрут кыттыылаахтара модельер Августина Филиппова уһулуччу үлэлэрин бу курдук чугастан сыныйан көрөр кыахтаахтар. Холобур, билигин нуучча улуу суруйааччыта Александр Пушкин айымньыларыгар олоҕурар үлэлэр көрдөрүүгэ тураллар", - Мария Дмитриева, корреспондент.  

Итини сэргэ тыа хаһаайыстыбата, оҥорон таһаарыы, бэйэни хааччыныы тэтимнээхтик сайдар. Олохтоох урбааннььыттар таһаарыылаах үлэлэригэр тирэҕирэн улуус экономиката сайдар, нэһилиэнньэ олоҕун хаачыстыбата тупсар.