Дьокуускай бастыҥ уһуйааччытын быһаардылар

"Василек" оҕо уһуйаанын иитээччитэ Аяна Слепцова бэйэтин оҕо саадыгар саамай үчүгэйинэн  ааҕыллан, аны киин куорат уокуругар бастыҥын дакаастыы кэллэ. Аан бастакытын маннык таһымнаах куонкуруска кыттар иитээччи долгуйара баһаам. Үгүс түһүмэҕи ааһан 10 бастыҥнар иһигэр киирбит.

Аяна Слепцов, куонкурус кыттыылааҕа: «Биһиги дьарыкпыт тиэмэтэ “Биһиги тула идэлэр” диэн этэ. Дьарык олус үчүгэйдик ааспыта. Станциларынан оонньообуппут, миэхэ үрдлүкү бөлөх түбэспитэ. Саамай наадалаах идэлэри таарыйбыппыт, ол курдук быраас, тутааччы, повар уонна баһаарынай».

5 төгүлүн саҥа барылынан ыытыллар "Сыл бастыҥ иитээччитэ"  куонкурус быйыл саҥа арыллыбыт үөрэҕирии киинигэр ыытылынна. Быйылгы күрэххэ 21 оҕо уһуйааныттан кыттааччы кэлэн идэтинэн төһө талааннааҕын, оҕолорго төһө сыһыаннааҕын, кыра дьону иитиигэ туох баар сатабылын үөрүйэҕин кэлэн көрдөрдүлэр. Күрэх 2 күн устата ыытылынна.

Саргылана Саидова, куонкуруһу тэрийээччи: «бастакы түһүмэхэ оҕолорго дьарык, онтон төрөппүттэри кытта дьарык. Оттон бүгүн икки тэрээһин буолла».

Иккис сылын бу куонкуруска кытта сылдьар Галина Попова сыллата куонкурус таһыма үрдүүр. Бэриллэр сорудахтар тупсан, кэҥээн иһэллэр диэн санаатын үллэстэр. Быйыл 10 бастыҥнар истэригэр киирбититтэн үөрүүтэ үгүс.

Галина Попова, куонкурус кыттыылааҕа: «Оҕолорго аһаҕас дьарык көрдөрдүбүт. Миэхэ улахан бөлөх оҕолоро түбэспиттэрэ. Тиэмэм саас туһунан этэ. Мин сахалыы уһуйааҥҥа үлэлиир буоламмын, нууччалыы ыытарбар ыарырҕаттым гынан баран, этэҥҥэ ыыттым, сыалбын ситистим».

Быйылгы куонкурус сүрүн уратыта - аҕа төрөппүттэри кытыннарыы буолла. Аҕаларбыт өрөспүүбүлүкэҕэ биллэр, аатаах-суоллаах спортсменнар. Күрэххэ кинилэр бэйэлэрин ыйытыктарын биэрдилэр.

Артём Варданян, төрөппүт: «Миэхэ бэйэбэр туһалаах баҕайы буолла. Бэйэбэр наадалаах иһитиннэриилэри биллим».

Сыллата Дьокуускай куорат уокуругун таһымыгар ыытыллар "Сыл бастыҥ иитээччитэ" куонкуруска кыайыылаах салгыы өрөспүүбүлүкэ таһымыгар кыттыаҕа.