Сэбиэскэй кэминээҕи ГОСТ-тунан астыыр бэкээринэ

Киирээти кытта килиэп минньигэс сыта муннуга саба биэрэр. Түргэн-тарҕан туттуулаах биэкэрдэр саһарчы буспут бухааҥкалары оһохтон  хостууллар.

Светлана Семёнова, биэкэр: "Биир оборуокка 270 килиэп киирэр, ол эбэтэр биир буһарыыга. Ону 3-4 угабыт". 

Оһохтон тахсаатынан тута мас иһиттэргэ сааһылаан, килиэби итиилии маҕаһыыннарга ыыталлар. "Эргис"  бэкээринэ тиэстэтин  аһытыынан оҥорор буолан килиэбэ ураты минньигэс уонна хаччыгырас.

"Бу сип-сибиэһэй саҥа буһан тахсыбыт килиэп Бэрдьигэстээх маҕаһыыннарыгар уонна аттынааҕы маҕаһыыннарга барар", - Мария Дмитриева, корреспондент.

Бу дьоҕус бэкээринэ соҕотоҕун Бэрдьигэстээҕи бүтүннүү уонна улуус 8 нэһилиэгин хааччыйар. 2017 сылтан дьиэ кэргэн бэйэ дьарык тэринэн, үлэ миэстэтэ таһааран дьоһуннаахтык дьаһанан олорор. Былырыын саҥа бэкээринэ туттубуттар, гааһынан үлэлиир саҥа оһох ылбыттар.    

Альберт Кривошапкин, "Эргис" бэкээринэ салайааччыта: "Ыйга 18 туонна, оттон сайыҥҥы ыйдарга 20 туоннаттан тахса килиэби астаан олоробут. Ону таһынан бурдук аһын ортотунан 3,5 туоннаны астыыбыт. Райпо саҕанааҕы сэбиэскэй технологиянан аспытын астыыбыт. Улахан собуоттар курдук туох да тупсарары куппаппыт. Ол иһин биһиги бурдукпут аһын нэһилиэнньэ сөбүлээн ылар ". 

Ити ыйыллыбыт технологияны 40 тахса сыл  үлэлиир Людмила Федорова уонна Прасковья Данилова илдьэ сылдьаллар. Кинилэр бу сыллар тухары биир ырысыабынан оҥороллор.

Прасковья Данилова, кондитер: "Биһиги бу сахалыы лэппиэскэ оҥоробут. Ыйааһына 500гр буолар. Бу сахалыыны суоратынан оҥоробут. Дьон сөбүлээн ылар". 

Бэрт үөрүйэхтик туттан аны сметанник диэн минньигэс бурдук аһын эргитэллэр.  Бу олохтоохтор биир саамай сакаастыыр көрүҥнэрэ. Барыта түргэн-тарҕан хамасаныыны эрэйэр, биир көрүҥ оһоххо киирээри кэтэһэр кэмигэр,  тута атын тиэстэни мэһийтэрбитинэр бараллар.

Людмила Фёдорова, кондитер: "Сахалыы лэппиэскэ, бородинскай килиэп, доруоһата суох килиэп, булочка, ватрушка. Сайаапканан үлэлиибит, 20 көрүҥү оҥоробут". 

"Эргис" бэкээринэ бу сайын өссө кэҥиир былааннаах. Ол курдук дьиэлэрин улаатыннарыахтара, оччоҕо оҥорон таһаарыы кээмэйэ, арааһа элбиэ. Сэбиэскэй кэминээҕи ырысыабынанн астыыр бэкээринэ минньигэс аһын Горнай улууһун сэргэ аттынааҕы улуустар, киин куораттар амсайыахтара.