“Далбар Хотун” күрэх тыа сирин уйгутун көрдөрөр

Хаҥалас улууһун Улахан Аан нэһилиэгиттэн кэлбит элбэх оҕолоох ийэ, эбэ Светлана Васильева "Бөртө" сылгы собуотун тутаах үлэһитэ. Светлана төрүөххэ эппиэттээх сүрүн үлэһит, осеменатор, хаһаайыстыбаҕа үлэлээбитэ 20-чэ сыл буолла. "Далбар Хотун" күрэххэ хаһаайыстыбатын, бүтүн улууһун аатыттан кытынна. Тарбаҕар талааннаах хаһаайка сыанаҕа кэтэр бэйэтин уонна дьонун таҥаһын-сабын барытын бэйэтин илиитинэн тикпит. Тыа хаһаайыстыбатын туйгуна оҕону кыраттан үлэҕэ сыһыаран иитэр көдьүүстээҕин үллэстэр.

Светлана Васильева, күрэх кыттыылааҕа, "Хоһуун Хотун" анал аат кыайыылааҕа: "Биһиги дьиэ кэргэн 4 оҕолоохпут. Биир оскуола оҕолоохпун, 3 оҕом улахаттар.  Итиэннэ 3 сиэннээх. Оҕону кыра эрдэҕиттэн үлэҕэ үөрэтиэххэ наада". 

"Далбар Хотун" 15 өрөспүүбүлүкэтээҕи күрэххэ 20 сайаапка киирбититтэн 7 бастыҥ хаһаайка талыллан финалга киирдэ. Бастакы түһүмэх - бэйэни билиһиннэрии. Манна Хаҥалас, Мэҥэ Хаҥалас, Нам, Чурапчы, Таатта, Уус Алдан улуустарын далбардара кытыннылар. Тыа сирин олоҕун, укулаатын тутан олорооччу дьиэ кэргэн тутаах дьоно бу күн туох сатабыллаахтарын, дьоҕурдаахтарын, талааннарын бар дьоҥҥо көрдөрдүлэр.

Айталина Никифорова-Шадрина - "Далбар Хотун" сурунаал бас эрэдээктэрэ: "Күрэспит сыала-соруга диэн тыа сиригэр уутуйан олорор элбэх оҕолоох, хаһаайыстыбалаах ийэни, эбэни киэҥ араҥаҕа таһааран көрдөрүү буолар. Ол аата биһиги тыа сирин олоҕун уйгутун көрдөрөбүт". 

Бастыҥ бүлүүдэ, талаан түһүмэхтэрэ көрөөччү биһирэбилин ыллылар. Күрэх кыттыылаахтара бары даҕаны киһи сөҕүөх айымньылаах үлэлээх, интэриэстээх, улахан иллээх дьиэ кэргэн иһирэх ийэлэрэ, эйэҕэс эбэлэрэ.

Екатерина Спиридонова, күрэх кыттыылааҕа, "Талба Хотун" анал аат кыайыылааҕа: "Дьахтар дьиэ кэргэҥҥэ оруола үрдүк. Оҕо иитиитэ, сүөһү-ас көрүүтэ, дьиэ-уот, үлэ-хамнас. Манна бастакы сүрүн оруол оҕо иитиитэ".  

Түмүккэ дьүүллүүр сүбэ быһаарыытынан Уус Алдан улууһуттан сылдьар Саина Григорьева "Далбар Хотун" үрдүк ааты сүктэ. Кини тулаайах оҕолору иитэр дьиэ кэргэн амарах ийэтэ, бэйэлэрин төрөппүт 4 оҕону тэҥэ 9 оҕону иитэллэр. 50 төбө ынахтаах-сылгылаах бөдөҥ хаһаайыстыбаны көрөн-истэн олороллор.  

Саина Григорьева, "Далбар Хотун-2026" күрэх кыайыылааҕа: "Далбар Хотун диэн наһаа улахан аат. Кини дьиэ кэргэн туллар тулааҕа буолар, кини тула олох эргийэр, кини дьиэ кэргэнин харыстыыр, араҥаччылыыр". 

Кыайыылааҕы тэҥэ, номинацияларынан бастыҥ хотуттар ааттаннылар. Ыал-ийэтинэн, оттон саха дьахтар таҥаралаах диэн өбүгэлэрбит этэллэрэ аныгы да кэмҥэ суолтатын сүтэрбэт.