Хаары ыраастааһын тэтимнээхтик барар
Главное
-
10 марта в 07:39Горнай Бэрдьигэстээҕэр тюльпаннар ситэллэр
-
10 марта в 07:18Более 5 тысяч листков нетрудоспособности закрыто через MAX в Якутии
-
10 марта в 06:56Отделение СФР России по Якутии возмещает затраты на оборудование рабочих мест для сотрудников с инвалидностью
-
10 марта в 06:37Начало перевозки грузов по железнодорожной ветке Сковородино - Рейново намечено на 2026 год
Дьокуускайга элбэх квартиралаах олорор дьиэлэртэн, үөрэх, итиэннэ араас тэрилтэлэр үрдүлэриттэн хаары түһэрии кэмэ салҕанар. Үрдүккэ үлэлииргэ тустаах эрэ тэрилтэлэр, итиэннэ үөрүйэх дьон ылсан хаары түһэрэллэр. Николай Саморцев 19 сааһыттан промышленнай альпинизмынан дьарыктанар, ол эбэтэр үрдүккэ оҥоһуллар үлэлэри сүрүннүүр. Кыһынын сарайтан хаары ыраастааһын, сайыҥҥы кэмҥэ үөһээ этээс түннүктэрин сууйуу, онтон да атын үлэлэр түбүктэрэ үүнэллэр.
Николай Саморцев, промышленнай альпинист: "Быйыл дьиэ үрдүн хаара нуорма, ортотунан 30 сантымыатыр курдук. Эбийиэкпит элбэх, сезон саҕаланыаҕыттан 20-чэкэ дьиэни ыраастаатыбыт".
Николайдаах биригээдэлэригэр алта-сэттэ буолан үлэлииллэр. Биир күн иһигэр сарсыардаттан киэһэ 6 чааска диэри диэри ортотунан 1 тыһыынча кыбадыраатынай миэтэрэ хаары түһэрэллэр. Уолаттар бары үрдүккэ үлэлии үөрүйэхтэр. Григорий Алексеев хаһыс да сылын промышленнай альпинизмынан дьарыктанар. Бу эбийиэккэ Григорий аллараа сэрэтэр үлэҕэ сылдьар.
Григорий Алексеев, үрдүккэ үлэлиир сулууспа үлэһитэ: "Үлэлиир сирбитин барытын анал лиэнтэнэн тардан бэлиэтээбиппит. Ону таһынан хонтуруллуур киһи турар. Кини дьон лиэнтэ иһигэр киирбэҕинэ эбэтэр дьиэттэн дьон таҕыстаҕына иһиирэр, оччоҕо үөһэ үлэ тохтуур".
Үрдүккэ үлэлиир, биллэн турар, бэрт сэрэхтээх. Куттала суох буолуу ирдэбиллэрин хайаан да тутуһаллар. Ол курдук тустаах тэрилинэн хааччыналлар, булгуччу страховкалаах эрэ эбээһинэстэрин толороллор. Хас да өттүттэн тутар баайыылаах итиэннэ 2 туоннаҕа диэри ыйааһыны уйар тростаах сылдьаллар.
Николай Саморцев, промышленнай альпинист: "Биэс сиринэн туттаһыктаах харыстыыр тэрили кэтэ сылдьабын. Ону таһынан эбии туттарардаахпын".
Санитарнай ыраастааһын кэмэ кэлэн Дьокуускай үрдүнэн үлэ күөстүү оргуйар. Уулуссаларга сарсыардаттан саҕалаан хастыы даҕаны тиэхиньикэ, үлэһиттэр быыстала суох түбүгүрэллэр. Куорат киин да суолларыгар, кытыы да уулуссаларыгар үлэ күүһүрэн турар. Салайар хампаанньалар, ТСЖ-лар, уокуруктар көрөр-истэр дьиэлэрин үрдүн хаарын булгуччу ыраастыахтаахтар.
