Горнай Бэрдьигэстээҕэр тюльпаннар ситэллэр

Оленовтар теплицаларыгар сандал саас бэлиэтэ тюльпан  номнуо сибэккилии турар. Хас күн аайы бу курдук сиппиттэрин көрөн хомуйаллар. Онон күн уһаата эрэ кэрэ аҥаардарга кэрэни бэлэхтээбитинэн бараллар. Саха сиригэр эриэккэс үүнээйини кинилэр олорпуттара быйыл 2 сыла. Онон бу дьыаланы баһылыы тутан, быйыл өссө уопутуран туран олортулар.

Саргылаана Оленова, сибэкки үүннэрээччи: "Биһиги 2025 сылтан саҕалаабыппыт. Былырыын уонна быйыл 5 тыһыынча угу олортубут. Саҥа тыллар сибэккилэри көрөр, үүннэрэр олус үчүгэй бөҕө буоллаҕа". 

Бу  дьарык  эбии дохуот аҕаларын тэҥэ оҕолору үлэҕэ уһуйууга, дьиэ кэргэнинэн бириэмэни тэҥҥэ атаарыыга көҕүлүүр.  Кырачааннар үөрүүнү кытта кэлэн сандал саас бэлиэтин  бүөбэйдииллэр. Тюльпан биир сүрүн уратыта - сөрүүнү сөбүлүүр. Онон теплица иһэ тымныы да диэххэ сөп. Болҕомтолоох сыһыаны тэҥэ бу сибэккилэр биир тэҥ температураны эрэйэллэр, ону сэргэ салгын сиигэ, хамсааһына  сүрүн оруоллаахтар.

Валентина Михайлова, сибэкки үүннэрээччи: "Табыллар эбит диэн сөбүлээтибит. Эһиил эмиэ олордуохпут дии саныыбыт. Теплицабытын өссө кэҥэтиэхпитин баҕарабыт". 

Бу тохсунньу саҥатыгар олорбут тюльпаннар билигин маннык силигилээн тураллар. Бастакы сылларыттан  гидропоника диэн ууга олордор ньыманы туһаналлар. Сибэккилэр тус туһунан иһиттэргэ силис тардан үүнэллэр.

"Аҕыйах сылтан бэттэх олохтоох сибэккини үүннэрээччилэр тюльпаны табан үүннэрэр буоллулар. Кинилэр этэллэринэн манна үүммүт сибэккилэр көрүҥнэрэ ордук күөх уонна тулуйумтуо буолаллар", - Мария Дмитриева

Анал теплицаҕа, туһааннаах усулуобуйаҕа үүнэр буоланнар сиэбэккилэр олус бөдөҥнөр, уктара көнө уһун. Билигин 10 араас суорт тюльпан үүнэ-силигилии турар. Араас дьэрэкээн өҥнөөх  кыһыл, оруосабай, фиолетовай, онтон да атын эгэлгэ өҥ-дьүһүн хараҕы сылаанньытар. Оттон букет буолан таҥыллан таҕыстаҕына өссө киэркэйэр.

Агафья Михайлова, сибэкки үүннэрээччи: "Кэлии тюльпаннардааҕар арыый өр турар. 1-1,5 нэдиэлэ турар. Луковицалаах эмиэ атыылыбыт, ууга уган баран".   

Кэрэ бизнеһы сайыннарааччылар инниктин өссө кэҥиир былааннаахтар, оччоҕо  сотору кэминэн теплица сылы эргиччи кэрэ уйата буолуо.