Саха Сиригэр норуот маастарын күнүн бэлиэтиибит
Өрөспүүбүлүкэҕэ норуот маастарын күнүн бэлиэтиибит. Үгэс быһыытынан Өксөкүүлээх Өлөксөй аатынан норуоттар доҕордоһууларын дьиэтигэр маастардар быыстапкалара турда.
Таатта улууһа 40-тан тахса маастар үлэтин быыстапкаҕа аҕалбыт. Айыылар ытык иһиттэрэ диэн ааттаах улуус иистэнньэннэрэ айбыт оҥоһуктара элбэх киһи болҕомтотун тарта. Бу ураты үлэни иистэнньэннэр Мандар Уус бырайыагынан, санаатынан айыллан оҥоһуллубут диэн кэпсииллэр.
Параскевья Бурнашева, "Мандар Уус" Айылгы уонна айымньы киинин салайааччыта: «9 Айыыларынан оҥоһулунна, аҕыс кырыылаах. Хаппаҕа Үрүҥ Айыы тойоммут буолар. Манна 60 биэс харахатаах харысхал киирдэ. Бу үлэбитин 140 хонук тиктибит, барыта илии үлэтэ буолар».
Быйылгы быыстапкаҕа барыта 25 улуус уонна 3 үөрэх кыһата кыттыыны ылар, 600-кэ маастар, уус үлэтэ турда. Манна хас биирдии маастар оҥорбут, айбыт үлэтэ ураты, кэрэ көстүүлээх.
Хотугу аҕыйах ахсааннаах төрүт норуоттар түмсүүлэрэ туруорбут үлэлэрэ элбэх киһи сэҥээритин куруук ылар. Аҕам саастаах Галина Сидорова 86 сааһыгар барда. Билигин да иистэнэр, айар-тутар. Быыстапканы хаһан да көтүппэт, куруук көхтөөх кыттыыныы ылар.
Тэрээһиҥҥэ уопуттаах маастардар үлэлэриттэн саҕалаан саҥа саҕалааччылар үлэлэрэ тиийэ көрдөрүүгэ турда. Быыстапкаҕа кыттыы эрэ буолбакка, билсиһии, уопут атастаһыы буолар диэн кыттааччылар этэллэр.
Ульяна Наумова, Хатырык нэһилиэгин култуура дьиэтин үлэһитэ: «Инники диэки хардыы баар бөҕө. Маастардарбыт элбээтилэр. Үлэ түмүктээх киһини үөрдэр, кынаттыыр».
Таатта улууһуттан сылдьар маастар Михаил Мордовской ууһаммыта төрдүс сылыгар барда. Быйылгы быыстапкаҕа аан бастакытын кыттар. Кыайыы чорооно диэн ааттаах айбыт үлэтин аҕалбыт.
Быыстапка таһынан бу күннэргэ араас күрэхтэр, маастар-кылаастар, инникини торумнуур төгүрүк остуоллар ыытыллыахтара. Күн бүгүн Өрөспүүбүлүкэ үрдүнэн 300 тахса норуот маастара, 700-тэн тахса норуот уус-уран оҥоһуктарын маастара баар.
Сергей Местников, СӨ бырабыытылыстыба бэрэссэдээтэлин солбуйааччы: «Норуот уус-уран оҥоһуутун сайыннарыыга биһиги сүрүн сорукпут. Айылҕа баайа эрэ буолбакка, бу норуот бэйэтэ үйэлэри уҥуордаан илдьэ кэлбит оҥоһуҥтара. Бу баайы сүтэрбэккэ ыччаттарбытыгар, оҕолорбутугар тириэрдиэхтээхпит».
Оттон бүгүн үгэс быһыытынан норуот маастарын күнүгэр дьон, норуот сахалыы таҥнан симэнэн сэлэлии хаамыаҕа. Сыллата тыһыынчаттан тахса киһи көхтөөх кыттыыны ылар, быйыл да элбэх киһи кыттара күүтүллэр.
