Саха сиригэр баһаары утары үлэ салҕанар

Хатастааҕы 8-с нүөмэрдээх баһаарынай чаас үлэһиттэрэ элбэх оҕолоох ыал дьиэтигэр киирэллэр. Кинилэри хаһаайка Ольга Капитонова көрсөр. Дьиэ улахан, 2 этээстээх, онон элбэх оҕолоох дьиэ кэргэн бастакы уочарат баһаартан сэрэхтээх буолууга болҕомтолорун уураллар. 

Ольга Капитонова, Хатас олохтооҕо: «Бастаан ыйыпыттара наада дуо диэн, сайаапка ылбыттара. Уонна Саҥа дьыл саҕана туруорбуттара».

Баһаартан үрдүк бэлэмнээх буолуу эрэһиимин чэрчитинэн хас биирдии дьиэҕэ АДПИны туруоруу үлэтэ салҕанар. Инструктордар дьиэлэринэн сылдьан сайаапканан автономнай сигнализацияны босхо туруораллар, биитэр баар дьиэлэргэ сигнализация кэһиллиитэ суох үлэлиирин бэрэбиэркэлииллэр.

Любовь Жиркова, Хатастааҕы 8№ баһаарынай чаас инструктора: «Батарейканнан барар. Баһаар үксүн түүн буолар. Онон АДПИ үчүгэйэ диэн кыра да буруо баар буоллар улахан тыас биэрэн дьоҥҥо быыһаналларыгар бириэмэ биэрэр».

Хатас - куорат эргин биир саамай бөдөҥ, сыллата кэҥии турар нэһилиэк буолар. Олохтоох баһаарынай чаас 6 тыһыынчаттан тахса нэһилиэнньэҕэ үлэтин ыытар, манна икки тыһыынча кэриҥэ чааһынай дьиэ баар.Баһаарынай инструктордар өйдөтүү- сэрэтии үлэлэрин дьиэлэринэн, тэрилтэлэринэн, социальнай эбийиэктэринэн сылдьан ыыталлар. Хатаска АДПИны маасабайдык туруоруу 5 сыллааҕыта саҕаламмыта. 

Наталья Игнатьева, Хатас нэһилиэгин социальнай үлэҕэ исписэлииһэ: «Саамай элбэҕи 2024 сылга туруорбуппут. Окружной админситрация бырагырааматынан. Биһи үлэбит диэн сайаапка хомуйабыт. Маннык ыаллар баалларын билэбит, бастакынан СВО дьиэ кэргэттэрин туруорбуппут».

Бу сыл саҥатыттан номнуо сигнализацияны туруорууга 46 сайаапка киирэн турар. Бастакы уочарат элбэх оҕолоох ыаллар, инбэлииттэр, соҕотох олорор кырдьаҕастар болҕомтоҕо сылдьаллар. Баһаар бардаҕына хойуу буруоҕа киһи аҕыйах мүнүүтүнэн өйүн сүтэрэн кыайан быыһаммат, онтон АДПИ кыра да буруону билэн эрдэттэн куттал суоһуурун биллэрэн киһи олоҕун быыһыыр кыахтаах. Хайа баҕарар кэмҥэ баһаарынайдар уоттан бэрт сэрэхтээх буоларга ыҥыраллар.

Максим Кириллин, Хатастааҕы 8№ баһаарынай чаас байыаһа: «Уоккутун араара сылдьын, оҕолоргутун соҕотох дьиэҕэ хаалларыман, испиискэни, уоту ыраах оҕо тиийбэт сиригэр уура сылдьын».

Баһаар тахсар түгэнигэр суһаллык 101 биитэр 112 нүөмэргэ эрийэргитин умнумаҥ.