Байыастарга көмө тиһигин быспакка ыытыллар

Хас биирдии түһүмэх барыта аттарыллан үлэ иҥнигэһэ суох чуолкайдык барар. Бу сытар куул собону  устудьуоннар биир күн иһигэр астаан, суулаан тоҥорон бүтэриэхтээхтэр. Онон  сүрүн күүс саамай үлэлээҕэр хатырыктааһыҥҥа уонна үөстээһиҥҥэ ууруллар.

Владимир Стручков, АГАТУ иһинэн технология уонна салайыы колледжын устудьуона: «Фроҥҥа көмө буолаары, дьоннорбутугар күүс-уох биэрэр гына. Анал байыаннай дьайыы саҕаланыытыттан көмөлөһөбүт. Балыктары ыраастаан тутатына тоҥоробут».

Устудьуоннар сүрүннээн булт аһын ыытарга бэлэмнииллэр. Оттон кинилэргэ биирдиилээн улуустар, нэһилиэктэр туттараллар. Холобур, бу сырыыга Кэбээйилэр сибиэһэй собо ыыппыттар. Онон сомоҕолоһуу бастатан туран дойдуну таптыырга көҕүлүүр.

Лилия Калачикова, АГАТУ иитэр үлэҕэ салаатын салайааччы: «Биһиги устудьуоннарбыт 2022 сылтан улахан үлэни ыыта сылдьаллар. 4 туонна курдук ас бэлэмнээтилэр. Астаан, суулаан госпиталларга ыыталаатыбыт уонна волонтердарга биэрэбит».

Устудьуоннар бу сырыыга бэлэмнээбит соболоро Москва куоракка бааһырбыттар госпиталларыгар ыыталлар. Дойду аһа кинилэргэ түргэнник өрүттэллэригэр күүс-көмө буолар. ыраастаммыт балыгы сууйан, биирдэ буһарар гына, ол эбэтэр биирдии киилэ гына ыйааһынныыллар. Барытын суруйан, учуоттууллар.

Кирилл Ефимов, АГАТУ иһинэн технология уонна салайыы колледжын устудьуона: «Тушки кладем в пакеты, убираем воздух и замораживаем. Раз в два-три месяца помогаем».

АГАТУ иһинэн колледжка повар идэтигэр 21 сыллаахтан устудьуоннары уһуйаллар. Бу иккис куурус оҕололоро. Кинилэр үөрэҕи уонна идэҕэ сатабылы тэҥҥэ тутан үөрэнэллэр. Эбиэт иннигэр маннык быраактыка онтон пааралар саҕаланаллар. Онон үтүө дьыаланы сэргэ устудьуоннар булт аһын астааһыҥҥа үгүс сатабылы ылаллар.