Саха сиригэр 2025 сыл түмүгүнэн 10 тыһ. тахса оҕо күн сирин көрбүтэ

25 саастаах эдэр ийэ Октябрина Гоголева элбэх оҕолоох ийэ статустанна. 3 оҕотун бу олунньу бүтүүтэ оҕолонно. Кырачаан уолчаанын этэҥҥэ бэйэтэ оҕолонон, балыыһаттан тахсарга бэлэмнэнэр. Эдэр ийэни кэргэнэ көрсө, өйүү кэлбит. 3200 ыйааһыннаах, 52 см уһуннаах кырачааҥҥа номнуо аат толкуйдаан сылдьаллар.

Октябрина Гоголева, эдэр ийэ: «27 чыыһылаҕа бэйэм төрөөтүм. Үһүс уолум Тимофей диэн».

Тохсунньу, олунньу ыйдар түмүктэринэн Дьокуускайдааҕы перинатальнай Кииҥҥэ уопсайа 846 кырачаан күн сирин көрдө. Билигин Кииҥҥэ 70 тахса саҥа төрөөбүт дьахтар баар, послеродовай салаа уопсайа 85 миэстэлээх.  Оҕо туруга ийэтин доруобуйатыттан быһаччы тутулуктаах. Маныаха оҕо төрөөтүн кытта тустаах чинчийиини ааһан ыарыыны эрдэттэн сэрэтиигэ болҕомто уураллар.

Светлана Сивцева, Дьокуускайдааҕы перинатальнай кииҥҥэ оҕо бырааһа: «Биһи оҕо доруобуйатын саҥа төрөөбүтүттэн дьиэтигэр барыаҕар диэри көрөбүт. Кини манна анал прививкаларын ылар уонна генетическэй ыарыыларга анаалыс ылабыт».

Хат дьахталлар ортолоругар бүгүҥҥү күҥҥэ үрдүк дабылыанньа уонна сахарнай диабет курдук ыарыы тарҕанна диэн быраастар бэлиэтииллэр. Маныаха кииҥҥэ тустаах патология салаатыгар ыарыылаахтары көрөн-истэн, эмтээн төрүүргэ бэлэмнииллэр.

Лариса Аргунова, Дьокуускайдааҕы перинатальнай киин акушер-гинеколога: «Дабылыанньалаах, сахарнай диабеттаах ийэлэр элбээтилэр. Урут наһаа оннук суох этэ».

Перинатальнай кииҥҥэ төрүүр ийэлэргэ бары усулуобуйа баар. тустаах бырагырааманан ийэ кэргэнин, биитэр чугас киһитин кытта бииргэ оҕолонор кыахтаах. Гороховтар дьиэ кэргэҥҥэ үөрүүлээх, бэрт долгутуулаах күн тосхойдо.

Александр Горохов, эдэр аҕа: «Бастакы оҕобут, кыыс төрөөтө. Күүтүүлээх оҕо, олуһун үөрдүбүт».

Саха сирэ нэһилиэнньэ эбиллиитинэн, оҕо төрөөһүнүн көрдөрүүтүнэн Уһук Илиҥҥэ инники күөҥҥэ сылдьар. Ааспыт сылга манна Кииҥҥэ биэс аҥар тыһыынчаттан тахса оҕо төрөөбүтэ.