Өлүөнэ очуостара кыһыҥҥы сынньалаҥ кэмигэр ыалдьыттары көрсөр

Саха сирин биир саамай кэрэ көстүүлээх, айылҕалаах, ураты миэстэнэн Өлүөнэ очуостара буолар. Национальнай пааркаҕа дьон-сэргэ сылын аайы манна кэлэн сынньанар, күүс-уох ылан барар.

Биһиги устар бөлөхпүт эмиэ Өлүөнэ очуостарыгар ыалдьыттаата. Манна былырыын үрдүгү дабайарга, дьон-сэргэ хаамарыгар, сынньанарыгар табыгастаах буоллун диэн маһынан киэҥ ыллык оҥоһуллубута.

Кырдьык да, ыллык кэҥээбит уонна уһаабыт. Киһи сынньана, аа-дьуо тахсар буолбут диэн дьон-сэргэ саҥардыллыбыт паарканы үрдүктүк сыаналаата.

Нелли Семёнова: «Тахсарга чэпчэки буолбут. Үчүгэй баҕайы тутуу. Эргэ кирилиэс ыарахан этэ».

Арылхан Прокопьев: «Икки сыл аннараа өттүгэр бастакыбын кэлбитим манна. Уһуна 2 км курдук, чаас курдук ыттыбытым уонно чаас курдук түстүм».

Сыл ахсын очуостары чугастан көрүөн баҕалаах киһи ахсаана элбии турар.  Киэһээтин сүүһүнэн лаампа умайан, кэрэ сиргэ сынньалаҥы өссө тупсараллар. Дьон ордук кыһыҥҥы өттүгэр кэлэ сатыыр, айана да түргэн, суола да табыгыстаах.

Дмитрий Громов, тэрийээччи: «Еланка пещераларын да буоллун, атын суолунан баран иһэн кэрэ көстүүлэри, ытык сирдэрбитин көрдөрөн ааһыахпытын сөп кыһын. Бу кыра кэрчиккэ табыгастаах кэм буолар».

Саргылаана Ионова Өлүөнэ очуостарыгар бастакытын сылдьар. Үөһэттэн, олус кэрэ көстүүлээх, салгына даҕаны атын диэн санаатын үллэстэр.

Саргылаана Ионова: «Бастакыбын таҕыстым. Наһаа кыраһыабай. Көстүүтүттэн долгуйаары гынным. Наһаа астык».

Оттон Ньургун Иванов үгэс быһыытынан сылын аайы манна кэлэр. Быйыл да, көтүппэккэ кэллэ. Күүс-уох ылабын, сынньанабын диэн этэр.

Ньургун Иванов: «Наар сылдьа сатыыбын, төһө кыалларынан кэлэ сатыыбын».

Өрөспүүбүлүкэ биир саамай киэн туттар сиригэр олохтоох дьон эрэ буолбакка, элбэх киһи тас дойдулартан кэлэр. Быйыл  "Өлүөнэ очуостара" национальнай паарка онус сезона, инникитин да өссө элбэх былааннаах.