Дьокуускайга хаарбах дьиэттэн көһөрүү ыытыллар

Максимовтар дьиэ кэргэн сып-сылаас сып-сырдык кыбартыыраларыгар олорон эрэ, оҕолоро улааппыт, бэйэлэрэ уһун кэмҥэ олорбут мас дьиэлэрин ахта саныыллар. Төһө да усулуобуйата суох буоллар, олохторун саамай кэрэ кэмнэрэ онно ааспыта. Оттон билигин кинилэр бочуоттаах сынньалаҥнарын саҥа дьиэҕэ атаарар дьоллоохтор.

Зинаида Максимова, "Звезднай" түөлбэ олохтооҕо: «50-ча сыл буоллаҕа буолуо Бүлүүлүүр суолга Коррекционнай оскуола аттыгар дьиэ ылан олорбуппут. Көһөрүүгэ хапсан манна көһөн кэлбиппит. Кыбартыырабыт аннараа олорбут дьиэбититтэн ордук буоллаҕа».

Максимовтар Звезднай түөлбэҕэ "Сири-уоту биир кэлим сайыннарыы" бырагырааманан көспүттэр. Бу бырайыагы олохтоох тутар хампаанньа үлэлэтэр. Ол эбэтэр судаарыстбаннай бырагырааманы тумнан, таһынан бэйэ кыаҕынан көһөрөр. "РИА" хампаанньа уопсайа 2032 сылга диэри 170 хаарбах дьиэттэн дьону көһөрөр соруктаах. Мантан билигин 12 дьиэ олохтоохторун толору саҥа кыбартыыралаабыт.

Семён Потапов, "РИА" тутар хампаанньа хаарбах дьиэттэн көһөрүүгэ салаатын салайааччы: «Бу сылга 100-чэ дьиэни көһөрөрбүт хаалла. Бу тутулла сылдьар дьиэҕэ уонна суол нөҥүө дьиэҕэ».

Бу бырагырааманан "Спортивнай" түөлбэ, 31 кыбаартал уонна аэропорт эргин дьиэлэри көһөртүүллэр. Сорук баараҕай онон үлэ тэтимнээхтик барар. Бу инниттэн "Звезднай" түөлбэҕэ сылы эргиччи тутуу тохтообокко барар. Утуу-субуу саҥа дьиэлэр үлэҕэ киирэллэр. 

Саҥа бэриллэр кыбартыыралар толору өрөмүөннээхтэр, "киир да олор" гына оҥоһуллаллар. бу номнуо бүппүт дьиэҕэ сотору кэминэн саҥа олохтоохтор киириэхтэрэ. Субу курдук көһөрүү тохтоло суох барар. 

Эдвардас Миколаюнас, "РИА" тутар хампаанньа хапытаалынай тутууга салайааччыта: «Сейчас по двум домам идет утепление фасадов, установка окон, устройство внутренних инженерных систем. Один из крупнопанельных домов уже завершен монтажем».

Итини сэргэ быйыл бу түөлбэҕэ оскуола үлэҕэ киириэҕэ.