Дьокуускай халыҥ хаары кытта “охсуһар”

Олунньу ый бүтэ илик эрээри салгын температурата -4 эрэ кыраадыс тымныыны көрдөрөр. Бү үүнэр өрөбүлү көрсө Приморьеттан уонна Хабаровскай кыраайтан атын сис былыт кэлэн эмиэ хаары аҕалыа. Ол эрээри Кытайтан кэлбит циклон курдук буолбакка, бу сырыыга кэлэр былыт аҕыйах хаары түһэриэ уонна сылаас турарын уһатан биэриэ. Маннык сааскы сылаас күн-дьыл уһук хотуттан ураты, Саха сирин үгүс улуустарыгар туруоҕа.

Улахан сөҥүү кэлэн куорат халыҥ хаар суорҕанынан бүрүннэ. Оптуорунньук күн устата тохтообокко түһэр хаар коммунальнай сулууспа уонна суол-иис үлэһиттэригэр түбүктэрин эптэ. Быыстала суох улахан тиэхиньикэ куорат уулуссаларын хаартан ыраастыыр, сүрүн болҕомтону айан-сырыы элбэх сирдэригэр уураллар. Маныаха дьон сылдьар сирдэрин, тротуардары ыраастааһын эмиэ тохтоло суох барар. Элбэх хаар түһэрин эрдэттэн билэн, бэлэмнээх көрүстүбүт диэн суол-иис үлэһиттэрэ этэллэр.

Айсен Николаев, “Якутдорстрой” тэрилтэ тупсарыы үлэтин  салаатын салайааччытын солбуйааччы: "Биһиги тэрилтэбит метеорологтар көрдөрүүлэрин барытын көрө олоробут. Онон элбэх хаар түһэрин билэр этибит. Ол иһин номнуо түүн тиэхиньикэни куорат уулуссаларыгар таһаарбыппыт. Итини сэргэ күнүскү үлэҕэ эбии дьону таһаардыбыт".

Халыҥ хаар түһэн суол үлэһэттирэ күүһүрдүллүбүт эрэһииминэн үлэлииллэр. Күннэтэ, бөлөҕүнэн арахсан суоллары хаартан ыраастыыллар. Туһааннаах тиэхиньикэ көмөтүнэн үлэ тэтимнээхтик барар. Күн бүгүн хаары ыраастааһынна 90 тиэхиньикэ икки симиэнэнэн үлэлии-хамсыы сылдьар. Үлэ түүннэри-күнүстэри барар. Күнүскү өттүгэр 40-тан тахса киһи, оттон түүнүн 30-ча киһи үлэлиир. Куорат уокуруктарын дворниктара эмиэ  туох баар күүһү хаары кытта охсуһууга уураллар.

Владимир Чемезов, Октябрьскай уокурук үлэһитэ: "Свкердэри хомуйабыт. Бу иннинэ Ленин проспегар бырааттыы Софроновтар пааматынньыктарын хаарын ыраастаабыппыт".

Наталья Горохова Октябрьскай уокурук муниципальнай дворнигынан үлэлээбитэ 2 сыла. Эр дьону кытта тэҥҥэ лаппаакы, күрдьэх тутуурдаах ыраастыыр-хомуйар үлэҕэ сылдьар.  Үлэтин ыарырҕаппаппын  этэр.

Наталья Горохова, Октябрьскай уокурук үлэһитэ: "Улаханнык ыарырҕаппаппын, наар хамнана сылдьарбын сөбүлүүбүн. Салгыҥҥа сылдьар үчүгэй. Сарсыарда 8 чаастан киэһэ 5 чааска диэри үлэлиибит. Сквердэри хомуйабыт".

Синоптиктар билгэлииллэринэн сөҥүү улахан аҥаара түстэ, мантан кэнники кыралаан хаардыаҕа. Салгыы саас, сылыйыы күүтүллэр.