Баһаарынайдар сааскы үөрэтиилэрэ саҕаланна

Халлааҥҥа МИ-8 бөртөлүөт көстөн, "Авиалесоохрана" байыастара малларын-салларын өссө биирдэ көрүнэллэр. Көтөр аалтан түһүү үөрэтиилэрин иннинэ ойуур үлэһиттэрэ хайаан даҕаны инструктаж аастылар, ирдэбил быһыытынан хас биирдии үөрэҕи ааһааччы бөртөлүөттэн 7 түһүөхтээх.

“Билигин байыастар 40 миэтэрэ үрдүктэн быанан түһэллэр. Оттон уопсайа бүгүҥҥү үөрэтиигэ 40 киһи кыттыыны ыла сылдьар. Мантан 25 аан бастакытын түһэллэр”, - Анастасия Добрянцева, корреспондент.

Бу ыйтан саҕалаан сайыҥҥы ойуур баһаардарын умулларыыга туһуламмыт  бэлэмнэниилэр саҕаланнылар. "Авиалесоохрана" бары салааларыттан кэлэн байыастар бэлэмнэниини ааһаллар. Теория чааһыттан саҕалаан, бу курдук быраактыка дьарыктара ыытыллаллар. Быйыл өссө саҥа эбии арыллыбыт авиа салаалар үөрэнэ кэллилэр.

Алексей Цой, парашютнай-десантнай бөлөх инструктора: "Эбии икки салаа арылынна. Ол курдук Орто Халыма уонна Эдьигээн улуустарыгар. Парашютист уонна десантник 180 буоллулар. 24 саҥа парашютиһы үөрэттибит. Ол кэннэ иккис түһүмэхтэр үөрэниэхтэрэ. Ону таһынан десантниктарбыт үөрэниэхтээхтэр".

Сыллата  Маҕан нэһилиэгэр ыытыллар бөртөлүөттэн түһүүлэр, сайыҥҥы кэмҥэ уот турбут сиригэр, ыксаллаах быһыы-майгы кэмигэр тиийэн  сөптөөхтүк, чопчу миэстэҕэ түһэргэ туһуланан ыытыллаллар. Амма улууһун авиа салаатын байыаһа Никита Петров быйыл 2 сезона.  Үөрэтиилэр этэҥҥэ ааһа туралларын, үөрэх кэнниттэн аны дьарыктар саҕаланалларын кэпсиир.

Никита Петров, "Амматааҕы" Авиалесоохрана салаатын үлэһитэ: "Бастаан парашютист, десантник курстарын ааспыппыт. Ол түмүгүнэн экзамен туттарбыппыт уонна Покровскайга баран бөртөлүөттэн ыстаммыппыт. Барыта 2 түспүппүт".

Бүгүҥҥү үөрэтиигэ эдэр саҥа үлэһиттэр уонна Покровскайдааҕы авиа салаа уопуттаах байыастара тэҥҥэ үлэлэстилэр. Бөртөлүөттэн түһүү кэннэ байыастар сып-сап миэстэлэригэр сүүрэн кэлэн быаларын дьаһайаллар. Түһүү быа уһуна 52 миэтэрэ.

Бу үөрэтиилэр кэнниттэн салгыы парашютунан  ыстаныы дьарыктара Хаҥалас улууһугар ыытыллыахтара. "Авиалесоохрана" байыастарын сааскы үөрэтиилэрэ   муус устар ортотугар диэри ааһыахтара.