Бизон төрүт дойдутугар үктэммитэ 20 сыла

Билэр саҥаларын истэн ыстаада от сиэри аһыы тиэтэйэр. Сибиэһэй от сыта ыраахтан угуйар. Бу Натали диэн ааттаах тыһы бизон, сотору кэминэн аан бастакытын ийэ аатын сүгүөҕэ. Манна биир саастарын туолбут ньирэйдээх ийэ бизоннар тэҥҥэ сылдьаллар. Кыстык кэминэн баран иһэр, тиийэр от саппааһа баар, бизоннар туруктара этэҥҥэ. Атыыр бизоннары туспа вольерга туталлар.

Семён Егоров, "Уус Буотама" бизонарий салайааччыта: "Биһиги иннибитигэр Боотур диэн бизон турар. Уопсайынан бу далга 7 төбө кыстаан турар. Бары ааттаахтар, кыра эрдэхтэринэ аат бэриллибитэ. Ааттарын истэллэр". 

Хаҥалас улууһугар баар питомникка бүгүҥҥү күҥҥэ 37 төбө бизон кыстаан турар. Хас биирдиилэрэ туспа ааттаахтар, киһи курдук ураты майгылаахтар. Сотору кэминэн төрүөх саҕаланыаҕа. Бизоннары  аһаталлар, ону таһынан кинилэр бэйэлэрэ эмиэ хаһан аһыыллар. Ол эрээри сылгы курдук туйахтарынан буолбакка, төбөлөрүнэн хаһан ас булуналлар. Бизон туох баар күүһэ барыта төбөтүгэр, онон баһынан хоруйан дириҥ хаары хаһар. 

Уус Буотама бизонарий Саха сиригэр бастакы бизоннары көрөр-истэр питомник быйыл төрүттэммитэ 20 сыла. Буотаманы тэҥэ бу былыргы оҕустары Горнай уонна Сунтаар улуустарыгар иитэллэр. Уопсайа 300-чэкэ төбө баар. Маны тэҥэ бизоннары атын регионнарга эмиэ ыыталлар. Бу барыта сэлии биир саастыылаахтарын төрүт сирдэригэр көһөрүү тустаах бырайыагынан ыытыллар. 

Семён Егоров, "Уус Буотама" бизонарий салайааччыта: "Былырыыҥҥы 10 ньирэйбитин, бу кулун тутарга араартаан, атын бизонарийга илдьиэхтээхпит".  

Бизоннары иитии бу научнай эрэ бырайыак буолбакка туризм биир хайысхата. Манна сааскыттан саҕалаан туристическай сезон саҕаланар. Дьон-сэргэ былыргы сүүнэ кыыллары көрөөрү ыраахтан-чугастан кэлэр. Бизоннары тэҥэ атын кыыллары эмиэ көрүөххэ сөп. Холобур, кулааһайдары.

Алексей Митрофанов, бизонарий үлэһитэ: "Саргылаана, Машка, Петя диэн ааттаахтар бааллар. Кинилэр эбиэһи олус сөбүлүүллэр. Магылара сымнаҕас".  

Ыраах Канадаттан кэлбит бизоннар Саха сиригэр былыргы историческай төрүт сирдэригэр этэҥҥэ олохсуйбуттара 20 сыл буолла. 1 туоннаҕа диэри ыйааһыннаах сүдү кыыллар халыҥ түүлэринэн, тулуурдарынан тыйыс тымныыбытыгар үөрэнэн ууһаан-тэнийэн олороллор.