Бу сылга номнуо 12 партия сэлии муоһа Кытайга көттө

Сөмөлүөккэ таһаҕаһы тиэйээри бэлэмнии сылдьаллар. Мантан күннэтэ Арассыыйа атын регионнарыгар уонна тас дойдуларга таһаҕас арааһа көтөр.  Россельхознадзор салалтатын иниспиэктэрдэрэ хас биирдии гурууһу сыныйан көрөллөр. Кинилэр эт,  үүт, балык бордууксуйатын, ону таһынан күндү түүлээх тириитин, сэлии муоһун бэрэбиэркэлииллэр.

Айсен Захаров, Россельхознадзор Саха сиринээҕи салаатын судаарыстыбаннай инспиэктэрэ: "Табаар кэллэҕинэ докумуонун көрөбүт. Холобур, бу билигин балык кэллэ. Манна бастаан биһиги ыйааһынын, маркировкатын тэҥниибит. Итини тэҥэ бэтэринээринэй докумуонун көрөбүт. Онно ким ыыппыта, ким тутуохтааҕа көстөр".

Бородууксуйа сүрүннээн  дойду бөдөҥ куораттарыгар уонна ыаллыы регионнарга барар. Онтон  тас дойдулартан  Кытай норуодунай өрөспүүбүлүкэтигэр ыытыллар.  Манна ирбэт тоҥҥо харалла сыппыт сэлии муоһа сүрүннээн тахсар. Экспорт  докумуона хас да бүк сыныйан бэрэбиэркэлэнэр.  Ирдэбилэ, биллэн турар, кытаанах. Сыл саҕаланыаҕыттан Харбин куоракка номнуо 12 партия көппүт. Оттон ааспыт сылга 37 туонна сэлии буоһа Саха сириттэн тахсыбыт.

"Ааспыт сылга Арассыыйа арас куораттарыттан уопсайа 55 тыһыынча туонна бородууксуйа киирбит. Бу кээмэй барыта Россельхознадзор иниспиэктэрдэрин нөҥүө ааһар. Холобур, биһиги рейдэбит кэмигэр балык бородууксуйата туһааннаах бэрэбиэркэни ааста", - Мария Дмитриева, корреспондент.

Кыһыҥҥы кэмҥэ ордук киис тириитэ өрөспүүбүлүкэттэн тахсар. Саха эр дьонун булда араас аукционнарга бу мантан көтөр. Ону барытын Россельзознадзор булгуччу учуоттуур. Ону таһынан тас дойдуларга бөрө тииһэ, бүүчээн ыыһа барар. Оттон билигин балык тахсыыта саамай элбэх.

Айсен Захаров, Россельхознадзор Саха сиринээҕи салаатын судаарыстыбаннай инспиэктэрэ: "Дьокуускай аэропуордун таһаҕас терминалын нөҥүө 5 тыһыынчаттан тахса таһаҕас хонтуруолланна. Манна 12 партия сэлии муоһа, 51 партия киис тириитэ, 63 партия балык бородууксуйата киирэллэр". 

Бэрэбиэркэ кэмигэр биир да ирдэбили кэһии бэлиэтэммэтэ. Туһааннаах ирдэнэр докумуоннар бары бааллар. Сөмөлүөтүнэн көтүүнү таһынан, сиринэн уонна тимир суолунан кэлэр таһаҕастар эмиэ күүстээх хонтуруолга тутуллаллар.