Байыастарга дойдуларыттан бэлэх барда

Волонтердар ыстааптара сарсыардаттан оргуйан олорор. Ким хаххалыыр сиэккэ өрөр, ким иистэнэр, ким кэлбит көмөнү наардаан бэлэмниир. Бу кинилэри биир санаа түмэр - кыайыыга.

Аҕам саастаах амарах санаалаах волонтер Тамара Попова "Боевые Шелкопряды" хамсааһыҥҥа кыттыспыта үһүс сылыгар барда. Сүрүннээн хаххалыыр сиэккэ өрүүтэ олус үлэлээҕин уонна бэйэтэ туспа ньымалааҕын кэпсиир.

Тамара Попова, волонтёр: "Матырыйаала анал буолар. Дьокуускайга баар таҥас маҕаһыыннарыгар суох. Сүрүн уратыта диэн ууну обруммат, уонна күнү тэйитэр".

Бу сиэккэни өрөргө, анал матырыйаал сакаастанан кэлэр. Волонтердар үлэлэрин чэпчэтээри уонна түргэтитэргэ олохтоох урбаанньыттар анал станок таҥан, оҥорон бэлэх ууммуттар. Кырдьык да, үлэлэрэ чэпчээбит, сиэккэ өрөргө да түргэн буолбут.

Сергей Васильев, "Боевые Шелкопряды Якутии" уопсастыбаннай хамсааһын салайааччыта: "10 сантымыатыр лиэнтэ быһыллар. Биир рулон таҥастан сэттэ сиэккэни оҥоробут. Бу матырыйаалы бэйэбит кыахпытынан атыылаһабыт.Инньэ гынан урбаанньыттар, нэһилиэнньэ көмө буолара буоллар".

Волонтердар сиэккэ өрөллөрүн таһынан, анал таҥастары, сахалыы харысхаллары уонна сылгы сиэлиттэн араас оҥоһуктары оҥороллор. Бу хамсааһынна өрөспүүбүлүкэ олохтооҕо бары кыттыһар, ким да туора турбакка, күүс-көмө буолар.

Наталья Слепцова,Хаҥалас улууһун олохтооҕо: "Хаҥалас улууһугар хас нэһилиэк аайы волонтердар бааллар. Оттон биһиги нэһилиэкпитигэр олох үлэ курдук тохтоло суох сылдьааччылар төрдүөбүт-бэһиэбит. Сүүстэн тахса сиэккэ оҥорон ыыттыбыт уонна аадырыстаах баһыылкалары эмиэ хаста да ыытан турабыт". 

"Боевые Шелкопряды" хамсааһын гуманитарнай көмөнү оҥорорун таһынан быйылгыттан  уйулҕа өттүнэн көмө оҥороллор. Бу курдук түмсэн, туора турбакка анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр.