МАХ сыһыарыыга туһааннах чат-ботунан бырааска суруттарыахха сөп

Балыыһаҕа бырааска суруттарыыга онлайн сервис өҥөтө улахан суолталаах. Маныаха дойду үрдүнэн МАХ национальнай мессенджерга доруобуйа харыстабылын сервистарын киллэрии үлэтэ бара турар. Саха сиригэр ахсынньы ыйтан МАХ сыһыарыыга туһааннах чат-ботунан бырааска суруттарар кыах баар буолбута. Оттон бу нэдиэлэттэн саҕалаан эбии өҥөлөрүнэн туһаныахха сөп.  Маныаха сервиска балыыһаларга тарҕаммыт туһааннаах ссылканан биитэр куар кодунан киирэллэр. 

Надежда Фёдорова, СӨ доруобуйа харыстабылын миниистирин солбуйааччы: «QR-кодунан эбэтэр ссылканан чат-ботка киирэн баран СНИЛСкытын уонна төрөөбүт күҥҥүтүн киллэрэҕит. Ол кэннэ бырааска суруттарыаххытын сөп. Ити өҥөлөрү салгыы сайыннара туруохпут».

Маны тэҥэ эмтиир бырааһы кытары телемедицинэ көмөтүнэн сибээстэһэн быстах кэмҥэ үлэлээбэт буолуу докумуонун сабар кыах үөскээтэ. Бу аҕыйах күн иһигэр телемедицина консультациятынан икки аҥар тыһыынча киһи туһанна, оттон сыл саҥатыттан МАХ чат-ботунан 6 тыһыынча киһи бырааска суруттарда. Дьокуускайга дьон үскэ 122 нүөмэринэн колл кииҥҥэ эрийэн поликлиникаларга  суруттарар.

Дьокуускайга нэдиэлэ иһигэр дьаҥнааһын уонна грипп ыарыыта боруогу 46 бырыһыан аһарбыта. Маныаха ордук улахан дьон  ыалдьыылара 3 төгүл элбээтэ. Күҥҥэ ортотунан 30-40-ча дьаҥнаан терапевт бырааска кэлэн көрдөрүнэр.

Саргылаана Ушницкая, Дьокуускайдааҕы 3№-дээх балыыһа терапевт бырааһа: «Больничнайдаахатар, аһаҕас хроническай бронхиттаахтар кэлэллэр. Биһиэхэ Госуслуги нөҥүө уонна колл-центрынан суруттарыахха сөп 122 нүөмэринэн. Уонна билигин МАХ сыһыарыынан суруттаран кэлиэххэ сөп буолла».

Оттон кырачааннар ортолоругар чуолаан 3-6 диэри саастаах оҕолорго ыарыы 25% үрдээтэ.  Быраастар дьон элбэхтэ мустар сирдэригэр  мааскалаах сылдьарга, бэйэни харыстанарга сүбэлииллэр.

Чэмэлиинэ Кулакова, Дьокуускайдааҕы 3№-дээх балыыһа педиатрия 1 салаатын сэбиэдиссэйэ: «Ыарыы тарҕаныыта тахса турар кэмигэр уопсай сиргэ мээнэ сылдьыбат курдук уонна илиигитин сууна сылдьыахха наада уонна мааска эрэһиимэ».

Бүгүҥҥү күҥҥэ колл-киини таһынан МАХ сыһыарыыга киирэн ссылканан биитэр QR-кодунан уочарата суох, түргэнник уонна дьиэттэн олорон бырааска суруттарыахха, консультация ылыахха биитэр ыалдьан олорбут докумуоннун саптарыаххын сөп.