Дьокуускайга ыччат ортотугар харбааһыҥҥа өрөспүүбүлүкэтээҕи чемпионат саҕаланна

Старт биллэриллиннэ. Саҥа сылга харбааһыҥҥа бастакы күрэхтэһии. Манна уопсайа 99 ыччат 14 саастарыттан 18-гар диэри илин-кэлин түсүһүөҕэ. Бу күрэххэ кыайбыт оҕолор, аны биир ыйынан Уһук Илиҥҥэ ыытыллар күрэххэ барар кыахтаныахтара. Онон күрэхтэһии тыҥааһыннаах буолара күүтүллэр.

Юрий Никифоров, "Чолбон" спортивнай оскуола дириэктэрин солбуйааччы: «Бү күрэхтэһиигэ кыттааччылар бары уопуттаах спортсменнар кытта сылдьаллар. Күрэхтэһиигэ 5 улуустан кэллилэр, ону таһынан Дьокуускай куорат спортивнай оскуолалара уонна чааһынай оскуолалар кытталлар».

Үс күн устата кыттааччылар хас да дистанцияҕа бэйэлэрин кыахтарын, дьоҕурдарын көрдөрүөхтэрэ. Маны сэргэ,  бу күрэххэ оҕолор бастакы уонна иккис разрядтарын туттарыахтара. 

Наталья Иванова, тренер: «Бүгүн 50 көхсүллэригэр харбыыллар, 200 брасс бардылар, 200 баттерфляй бардылар. Элбэх оҕо разряд көрдөрдө. Үөрэнээччим 1 разрядын толордо. Билигин эстафета буолан ааста».

Майя Кириллина тренерынан үлэлээбитэ 10-тан тахса сыл буолла. Кини 35 оҕону дьарыктыыр, ол онтон 8 оҕото бу күрэххэ кытта сылдьар.   Көрдөрүүлэрэ бастакы күҥҥэ үчүгэй, кыһыннары тохтообокко дьарыктаммыппыт түмүктээх буолуо диэн эрэнэр.

Майя Кириллина, тренер: «Түмүктэри көрдөххө үчүгэй буолбуттар. Оҕолор улаатаннар результакка үлэлии сылдьаллар. Кыайыыга эрэллээхпин».

Күн бүгүн бассейҥҥа спортивнай харбааһыҥҥа уопсайа 1,5 тыһыынчаттан тахса оҕо дьарыктанар. Харбааһыҥҥа дьарыктанар оҕолор Өрөспүүбүлүкэҕэ эрэ буолбакка Арассыыйаҕа тиийэ үрдүк ситиһилэнэллэр.

Бүгүн харбааһыҥҥа күрэхтэһии иккис күнэ. Сарсын түмүк тахсыаҕа. Күрэхтэһии түмүгүнэн Саха сирин сүүмэрдэммит хамаандата оҥоһуллуоҕа.