Таһырдьа биллэ сылыйан, дьон-сэргэ сибиэһэй салгынна талаһара, дьаарбайара үксээбит

Халлаан сылыйан сибиэһэй салгыҥҥа сылдьааччы элбээтэ. Уһун кыһын кэннэ эти-хааны чөлүгэр түһэрэргэ билигин тоҕоостоох кэм. Дьокуускайдааҕы сынньалаҥ пааркатыгар дьон-сэргэ тоҕуоруһа мустар.

Күҥҥүн хайдах саҕалыыгын да, оннук ааһар диэн санаанан салайтаран, бу курдук үөрэ-көтө, ырыа аргыстаах хаалыктаах хаамыынан дьарыктанар дьон сарсыардата саҕаланар.

Күн аайы дьон-сэргэ, сарсыарда 5:30 чаастан хас уокурук, паарка аайы түмсэн хаама тахсаллар. Хаамыы киһи доруобуйатыгар туһата элбэх диэн этэллэр.

Айталина Рожина, Дьокуускай куорат олохтооҕо: «Систэрэ, атахтара ыалдьан хаампат курдук буолан билигин олох хаама сылдьар дьоннордордоохпут. Ол иһин наһаа улахан туһалаах дии саныыбын. Сарсыарда түмсэн, күлэн, оонньоон, кэпсэтэн тарҕастахпытына күннээҕи настроениябытын оҥостобут».

Аҕам саастаах киин куорат олохтооҕо Валентина Толстоухова хаалыктаах хаамыынан дьарыктаммыта 12 сылыгар барда. Күн аайы, көтүппэккэ хаамабын, күүс-күдэх ылабын, доруобуйам да тубуста диэн үөрэ кэпсиир.

Валентина Толстоухова, Дьокуускай куорат олохтооҕо: «Чэгиэн туруктаах, доруобай буолаары сиэннэри кытта сиэттиһэ сылдьаары, кэккэлэһэ үөрэ-көтө сылдьаары».

Кэнники кэмнэ дьон-сэргэ чөл олоҕу тутуһууга улахан болҕомтону уурар буолла. Араас эти-хааны чэбдигирдэр дьарыктарга сылдьар. Маныаха, Өрөспүүбүлүкэ үрдүнэн нэһилиэнньэ дьарыктанарыгар усулуобуйа тэриллэр, болҕомто ууруллар. 

Зинаида Афанасьева, Өрөспүүбүлүкэтээҕи маассабай спорт салалтатын инструктор - методиһа: «Дорубай нэһилиэк диэн бырайыак үлэлиир. Ол чэрчитинэн улуустарга барытыгар хаамааччылар бааллар».

Оттон билигин хаалыктаах хаамыынан утумнаахтык Киин уонна Кыайыы пааркатыгар дьарыктаналлар.  Айылҕалыын алтыһан, сибиэһэй салгыҥҥа сылдьан, доруобуйаларын тупсараллар, үйэлэрин уһаталлар.