Биллиилээх кыраайы үөрэтээччи Петр Винокуров төрөөбүтэ 75 сылыгар аналлаах  быыстапка арылынна

Биллэр кыраайы үөрэтээччи, историческай наука кандидата Петр Винокуров саха  түмэлэ сайдарыгар сүҥкэн улахан кылааты киллэрсибит биирдэстэринэн буолар. Кини 30-тан тахса сыл түмэлгэ үлэлээбит, кыраайы үөрэтиигэ анаабыт. Чинчийбит, арыйбыт үлэлэрин күн бүгүҥҥээҥҥи диэри биллэр историктар, кыраайы үөрэтээччилэр, учуонайдар үөрэтэллэр, холобур оҥостоллор.

Диана Осипова, Е.М. Ярославскай аатынан саха түмэлин методиһа: «Кини чинчийээччи быһыытынан бүтүн өрөспүүбүлүкэбит мусуойдарын чинчийиигэ үлэлэспит киһиннэн буолар. Петр Васильевич үлэлэрэ энциклопедия тэҥэ сыаналаналлар диэн этиэххэ сөп».

Быыстапкаҕа саха түмэлин пуондатыттан уонна Петр Васильевич дьиэ кэргэнэ туттарбыт экспонаттара турдулар. Улахан үлэлэрин, суруйууларын кэргэнэ Любовь Афанасьевна бу сыллар устата барытын түмэн, таҥан  түмэлгэ бэлэх уунна.

Любовь Винокурова, П.В. Винокуров кэргэнэ: «Түүннэри-күнүстэри суруйар этэ, архыыпка элбэхтэ сылдьыбыта. Уон тэтэрээтин уонна суруктырын бу мусуойга бэлэх уунабын ».

Бэлиэ күннэ Петр Винокуров бииргэ үлэлээбит табаарыстара, аймахтара, учуонайдар, кыраайы үөрэтээччилэр түмсэн ахтан-санаан ыллылар. Кини 300-тэн тахса хаһыыга сылдьыбыта, элбэх үлэлээх, улахан арыйыылардаах. Биир сүрүн үлэтэ Ньурба улууһугар 1971 сыллаахха биллэр археологтыын Иван Константиновтыын уонна этнограф Федор Зыковтыын үлэлэрэ буолар.

Пантелеймон Петров, историческай наука кандидата: «Манчаары уҥуоҕун Ньурба улууһугар хостообуттара. Онон Лебединская диэн биллэр скульпторга бюстун оҥотторбуттара».

Петр Винокуров үлэлэрин, история чахчытын кэпсиир, ураты быыстапканы Емельян Ярославскай аатынан түмэлгэ көрүөххэ сөп. Быыстапка икки ый устата туруоҕа.